പുഴക്കടവിലിരുന്നുള്ള ലഹരി ഉപയോഗം ചോദ്യം ചെയ്തു; വീട്ടിൽ നിന്ന് വലിച്ചിറക്കി യുവാവിനെ മർദ്ദിച്ച കേസിൽ ഒരാൾ പിടിയിൽ

തൃശൂർ: ക്രിസ്തുമസ് ദിനത്തിൽ പൊതുസ്ഥലത്തിരുന്ന് ലഹരി ഉപയോഗം ചോദ്യം ചെയ്ത യുവാവിനെ മർദ്ദിച്ച കേസിൽ ഒരാൾ പിടിയിൽ. പുലക്കാട്ടുകര സ്വദേശി ബിനുവിനെ മർദ്ദിച്ച കേസിലാണ് അറസ്റ്റ്. സംഘത്തിലെ എട്ട് പേരെയും തിരിച്ചറിഞ്ഞതായി പോലീസ് അറിയിച്ചു. ഇതിൽ ഒരാളെയാണ് പോലീസ് പിടികൂടിയത്.

സംഭവം നടന്ന് മൂന്ന് ദിവസങ്ങൾക്ക് ശേഷമാണ് കേസിൽ പ്രതികളായവരിൽ ഒരാളെ പോലീസ് പിടികൂടിയത്. ആക്രമണത്തിൽ നേരിട്ട് പങ്കാളികളാവാത്ത നാല് പേർ കൂടി ഉടൻ പിടിയിലാകുമെന്ന് പോലീസ് വ്യക്തമാക്കി. ക്രിസ്തുമസ് ദിനത്തിൽ ബിനു പെൺമക്കളുമൊത്ത് പുഴക്കടവിലേക്ക് പോയിരുന്നു.

എട്ട് യുവാക്കൾ പുഴക്കരയിൽ ഇരുന്ന് ലഹരി ഉപയോഗിക്കുന്നതിനെ ബിനു ചോദ്യം ചെയ്തതാണ് സംഭവങ്ങൾക്ക് തുടക്കം. ഇതിൽ പ്രകോപിതരായ സംഘം വീട്ടിലേക്ക് മടങ്ങിയ ബിനുവിന് പിന്നാലെ ബൈക്കിലെത്തി ആക്രമിക്കുകയായിരുന്നു. വീട്ടിൽ അതിക്രമിച്ചുകയറി ബിനുവിനെ ഉപദ്രവിക്കുകയും കുട്ടികളുടെ മാല പൊട്ടിക്കുകയും അയൽവാസിയെ ബിയർ കുപ്പി ഉപയോഗിച്ച് അടിച്ച് പരിക്കേൽപ്പിക്കുകയും ചെയ്തു. ആക്രമണത്തിൽ ബിനുവിന് സാരമായി പരിക്കേറ്റിരുന്നു.