കുസാറ്റ് ദുരന്തം; സംഘാടനവുമായി ബന്ധപ്പെട്ട് ഗുരുതര വീഴ്ച; ഉപസമിതി റിപ്പോർട്ട്

കൊച്ചി: കുസാറ്റ് ടെക് ഫെസ്റ്റിൽ ഉണ്ടായ അപകടത്തിൽ സംഘാടനവുമായി ബന്ധപ്പെട്ട് ഗുരുതര വീഴ്ചയാണ് സംഭവിച്ചതെന്ന് ഉപസമിതി സിൻഡിക്കേറ്റ് റിപ്പോർട്ട്. പോലീസ് സുരക്ഷ ആവശ്യപ്പെട്ടുകൊണ്ടുള്ള കത്ത് കൈമാറുന്നതിൽ രജിസ്ട്രാർക്കും വീഴച സംഭവിച്ചതായി റിപ്പോർട്ടിൽ ചൂണ്ടിക്കാട്ടുന്നു. ടെക്‌ഫെസ്റ്റിന്റെ സാമ്പത്തിക വശങ്ങളും പരിശോധിക്കുന്നതായിരിക്കുമെന്ന് റിപ്പോർട്ടിൽ പരാമർശിച്ചിട്ടുണ്ട്.

തിക്കും തിരക്കും നിയന്ത്രിക്കുന്നതിൽ സംഘാടകർക്ക് വീഴ്ച സംഭവിച്ചിട്ടുണ്ട്. അനധികൃതമായി പണപ്പിരിവ് നടന്നിരുന്നോ എന്നത് സംബന്ധിച്ചും സംശയം നിലനിൽക്കുന്നുവെന്നും സിൻഡിക്കേറ്റ് ഉപസമിതിയിൽ വ്യക്തമാക്കുന്നു. ഇക്കാര്യത്തിലും വിശദമായ അന്വേഷണം നടന്നേക്കും.

എന്നാൽ സംഭവവുമായി ബന്ധപ്പെട്ട് ഇതുവരെയും പോലീസ് ആരെയും പ്രതി ചേർത്തിട്ടില്ല. നൂറിൽ അധികം ആളുകളുടെ സാക്ഷിമൊഴികളാണ് രേഖപ്പെടുത്തിയിട്ടുള്ളത്. ഉപസമിതി റിപ്പോർട്ട് പരിശോധിച്ചതിന് ശേഷമാകും പ്രതി ചേർക്കൽ ഉൾപ്പെടെയുള്ള നടപടികൾ കൈക്കൊള്ളുക.