സന്നിധാനത്തേക്കുള്ള അയ്യപ്പ ഭക്തരുടെ വാഹനം തടഞ്ഞിടുന്നു; ഭക്ഷണവും വെള്ളവുമില്ലാതെ വലഞ്ഞ് തീർത്ഥാടകർ

പത്തനംതിട്ട: സന്നിധാനത്ത് തീർത്ഥാടകരുടെ വൻ തിരക്കേറുന്നു. സന്നിധാനത്ത് നിന്നും നീലിമല വരെ വലിയ തിരക്കാണ് അനുഭവപ്പെടുന്നത്. നിലയ്‌ക്കലും ഇടത്താവളങ്ങളിലും ഉൾപ്പെടെ തീർത്ഥാടകരുടെ വാഹനങ്ങൾക്ക് നിയന്ത്രണം ഏർപ്പെടുത്തിയിട്ടുണ്ട്.

ഇന്നലെ ശബരിമലയിൽ ഈ സീസണിലെ ഏറ്റവും വലിയ തിരക്കാണ് ഉണ്ടായിരുന്നത്. പമ്പയിൽ നിന്നും സന്നിധാനത്തെത്തുന്നതിന് 16 മണിക്കൂറിൽ അധികം നീണ്ട ക്യൂ ആണ് ഉണ്ടായിരുന്നത്. തിരക്ക് ഏറിയതോടെ പോലിസ് പലയിടത്തും വാഹനങ്ങൾ തടഞ്ഞിടുകയാണ് .

12 മണിക്കൂറിലേറെ പെരുവഴിയിൽ കിടന്ന അയ്യപ്പഭക്തർ പ്രതിഷേധിച്ചു പൊൻകുന്നത്തും വൈക്കത്തും റോഡ് ഉപരോധിച്ചു.ഇതര സംസ്ഥാന ഭക്തരും കേരളത്തിൽ നിന്നുള്ള അയ്യപ്പ ഭക്തരുമാണ് പ്രതിഷേധിക്കുന്നത്. പ്രതിഷേധക്കാരെ അനുനയിപ്പിക്കാൻ പോലീസ് ശ്രമിക്കുകയാണ്.