പേഴ്‌സിൽ പ്രത്യേക അറകളുണ്ടാക്കി ലഹരി കടത്ത്; പ്രതികൾ പിടിയിൽ

എറണാകുളം: 65 എൽഎസ്ഡി സ്റ്റാമ്പുകളുമായി രണ്ട് പേർ അറസ്റ്റിൽ. കൊടുങ്ങല്ലൂർ സ്വദേശി നസറുദ്ദീൻ, നിബിൻ എന്നിവരാണ് അറസ്റ്റിലായത്. ലക്ഷങ്ങൾ വിലമതിക്കുന്ന ലഹരി മരുന്നാണ് സംഘം പിടികൂടിയത്.

‘ഓപ്പറേഷൻ ക്ലീൻ എറണാകുളം റൂറൽ” പദ്ധതിയുടെ ഭാഗമായുള്ള പരിശോധനയിലാണ് ഇരുചക്രവാഹനത്തിൽ കടത്തുകയായിരുന്ന രാസലഹരി പിടികൂടിയത്. അയ്യായിരത്തിൽ അധികം രൂപയ്‌ക്കാണ് ഇവർ വിൽപ്പന നടത്തുന്നത്. ന്യൂ ഇയർ ആഘോഷങ്ങൾക്കായാണ് ഇത് കൊണ്ടുവന്നതെന്ന് പോലീസ് വ്യക്തമാക്കി. പേഴ്‌സിൽ പ്രത്യേക അറകൾ ഉണ്ടാക്കി അതിലാണ് ലഹരി മരുന്ന് സൂക്ഷിച്ചിരുന്നത്. പോലീസിനെ കടന്ന് രക്ഷപ്പെടാൻ ശ്രമിച്ചെങ്കിലും പിന്തുടർന്ന് പുറപ്പിളളിക്കാവ് റോഡിൽ വച്ച് പിടികൂടുകയായിരുന്നു.