യുവാവിനെ കരിങ്കല്ലുകൊണ്ടിടിച്ച് കൊലപ്പെടുത്താൻ ശ്രമം; രണ്ട് പേർ പിടിയിൽ

കോട്ടയം: കടുത്തുരുത്തിയിൽ യുവാവിനെ കൊലപ്പെടുത്താൻ ശ്രമിച്ച കേസിൽ രണ്ട് പേർ അറസ്റ്റിൽ. കടുത്തുരുത്തി സ്വദേശികളായ അജി, സത്യൻ എന്നിവരാണ് അറസ്റ്റിലായത്. കഴിഞ്ഞ ദിവസം രാത്രി ഒമ്പത് മണിയോടെയായിരുന്നു സംഭവം. പ്രതികളും യുവാവിന്റെ ബന്ധുവും തമ്മിലുണ്ടായ വഴക്ക് അവസാനിപ്പിക്കാൻ ഇടപെട്ടതിന്റെ വിരോധത്തിലാണ് ആക്രമണം നടന്നത്.

ഇരുവരും ചേർന്ന് യുവാവിനെ മർദ്ദിക്കുകയും കരിങ്കല്ല് ഉപയോഗിച്ച് തലയ്‌ക്കിടിയ്‌ക്കുകയുമായിരുന്നു. മുമ്പും ഇരുവർക്കുമെതിരെ കടുത്തുരുത്തി പോലീസ് സ്‌റ്റേഷനിൽ ക്രിമിനൽ കേസുകൾ നിലവിലുണ്ട്. കോടതിയിൽ ഹാജരാക്കിയ രണ്ട് പേരെയും റിമാൻഡ് ചെയ്തു.