മണ്ഡലകാലം; സന്നിധാനത്ത് ഭക്തജനത്തിരക്ക്; ക്യൂ ശരംകുത്തി വരെ

പത്തനംതിട്ട: സന്നിധാനത്ത് ഭക്തജന പ്രവാഹം. മണിക്കൂറിൽ 4,200 മുതൽ 4,500 അയ്യപ്പഭക്തർ വരെ പതിനെട്ടാം പടി ചവിട്ടി. ശബരിമലയിൽ അയ്യപ്പഭക്തരുടെ ക്യൂ ശരംകുത്തി വരെ നീണ്ടിട്ടുണ്ട്. വലിയ നടപ്പന്തലിൽ ആറ് വരിയാണ് നിലവിൽ ക്യൂ ഏർപ്പെടുത്തിയിട്ടുള്ളത്. വെർച്വൽ ക്യൂ മുഖേന 90,000 ഭക്തരാണ് ഇന്ന് ബുക്ക് ചെയ്തിരിക്കുന്നത്.

പമ്പയിൽ നിന്നും രാവിലെ ആറ് മുതൽ എട്ട് മണിക്കൂറെടുത്താണ് ഭക്തർ ദർശനം നടത്തുന്നത്. മണ്ഡലപൂജയ്‌ക്ക് മുമ്പുള്ള ദിവസങ്ങളിൽ വെർച്വൽ ക്യൂ ബുക്കിംഗ് 90,000 മുകളിലെത്തിയിട്ടുണ്ട്. സ്‌പോട്ട് ബുക്കിംഗ് കൂടി കണക്കിലെടുത്ത് ഒരു ലക്ഷത്തിൽ അധികം ഭക്തർ മലകയറാനാണ് സാധ്യതയെന്ന് പോലീസ് പറയുന്നു.

ഇക്കാരണത്താൽ തന്നെ വരും ദിവസങ്ങളിൽ കൂടുതൽ സജ്ജീകരണങ്ങളൊരുക്കാനാണ് നീക്കം. സന്നിധാനത്ത് എത്തുന്ന കുട്ടികൾക്ക് പ്രത്യേക ദർശന സൗകര്യം ഒരുക്കും.