മണ്ഡലകാലം; സന്നിധാനത്ത് ഉടൻ സൗജന്യ വൈഫൈ; ബിഎസ്എൻഎലുമായി കൈകോർത്ത് ദേവസ്വംബോർഡ്

പത്തനംതിട്ട: മണ്ഡലകാലത്തോടനുബന്ധിച്ച് സന്നിധാനത്തെത്തുന്ന ഭക്തർക്ക് സൗജന്യ വൈഫൈ സേവനം ലഭ്യമാക്കാനൊരുങ്ങി ദേവസ്വം ബോർഡ്. മലകയറുന്ന അയ്യപ്പഭക്തർക്ക് പരമാവധി സൗകര്യം സജ്ജമാക്കുന്നതിന്റെ ഭാഗമായാണ് നീക്കമെന്ന് ദേവസ്വം ബോർഡ് പ്രസിഡന്റ് പിഎസ് പ്രശാന്ത് അറിയിച്ചു. ബിഎസ്എൻഎലുമായി സഹകരിച്ചാകും സേവനം ഭക്തരിലെത്തിക്കുക.

ഭക്തർക്ക് പരമാവധി അരമണിക്കൂർ സൗജന്യ വൈഫൈ ഇതിലൂടെ ലഭ്യമാകുമെന്ന് അധികൃതർ വ്യക്തമാക്കി. നെറ്റ്വർക്ക് പ്രതിസന്ധി മൂലം മിക്ക സാഹചര്യങ്ങളിലും ഭക്തർക്ക് വീട്ടിലേക്ക് ബന്ധപ്പെടാൻ സാധിക്കാറില്ല. ഇതിനൊരു പരിഹാരം നൽകുക എന്ന ലക്ഷ്യത്തോടെയാണ് ദേവസ്വം ബോർഡ് ബിഎസ്എൻഎലുമായി സഹകരിച്ച് പദ്ധതിയ്‌ക്ക് രൂപം നൽകിയത്. പദ്ധതിയുടെ ആദ്യഘട്ടമെന്ന നിലയിൽ നടപ്പന്തൽ, തിരുമുറ്റം, സന്നിധാനം, മാളികപ്പുറം, ആഴിയുടെ ഭാഗങ്ങൾ, മാളികപ്പുറത്തുള്ള അപ്പം-അരവണ കൗണ്ടറുകൾ, മരാമത്ത് കോംപ്ലക്സ്, ആശുപത്രികൾ എന്നിവിടങ്ങളിൽ വൈഫൈ ലഭ്യമാകും.

പ്രാഥമിക ഘട്ടത്തിൽ 15 വൈഫൈ ഹോട്ട്സ്പോട്ടുകളാകും ഉണ്ടാകുക. നിലവിൽ പമ്പ എക്സ്ചേഞ്ച് മുതൽ നീലിമല, അപ്പാച്ചിമേട്, ശരംകുത്തി, മരക്കൂട്ടം എന്നിവിടങ്ങളിൽ സന്നിധാനത്തേക്ക് ഒപ്്റ്റിക്കൽ ഫൈബർ കേബിൾ സ്ഥാപിച്ചിട്ടുണ്ട്. ഇതിനാൽ തന്നെ വൈഫൈ പദ്ധതിയ്‌ക്ക് ആവശ്യമായ അടിസ്ഥാന സൗകര്യം വേഗത്തിൽ തന്നെ പൂർത്തിയാക്കുമെന്ന് ബിഎസ്എൻഎൽ വ്യക്തമാക്കി.