ആലപ്പുഴ : നവകേരള സദസ് ബസിന് നേര്ക്ക് യൂത്ത് കോണ്ഗ്രസ് പ്രവര്ത്തകരെ മുഖ്യമന്ത്രിയുടെ ഗണ്മാന് ക്രൂരമായി മര്ദ്ദിച്ച സംഭവത്തില് കേന്ദ്ര ആഭ്യന്തര മന്ത്രി അമിത് ഷായ്ക്ക് പരാതി നല്കി കോണ്ഗ്രസ്. ഗവര്ണര് ആരിഫ് മൊഹമ്മദ് ഖാനോടും പരാതിപ്പെട്ടിട്ടുണ്ട്.ഡി ജി പി, ദേശീയ മനുഷ്യാവകാശ കമ്മീഷന് എന്നിവര്ക്കും പരാതി നല്കി.
കോണ്ഗ്രസ് ആലപ്പുഴ ബ്ലോക്ക് സെക്രട്ടറി സജിന് ഷെരീഫ് ആണ് പിണറായി വിജയന്റെ ഗണ്മാന് അനില് കല്ലിയൂരിന് എതിരെ പരാതി നല്കിയത്.അതേസമയം, കരിങ്കൊടി കാട്ടിയ യൂത്ത് കോണ്ഗ്രസുകാരെ ഗണ്മാനും സംഘവും തല്ലിച്ചതച്ചത് കണ്ടില്ലെന്നാണ് മുഖ്യമന്ത്രി പറഞ്ഞത്.ഗണ്മാന് തന്റെ സുരക്ഷയാണ് ഒരുക്കുന്നത്. ചാടിവീണയാളെ തള്ളിമാറ്റുന്നതാണ് കണ്ടത്. ഒപ്പമുളള അംഗരക്ഷകര് തന്റെ സുരക്ഷകരുതിയാണ് പ്രവര്ത്തിക്കുന്നതെന്നും സാധാരണ യൂണിഫോമിലുള്ള പൊലീസുകാര് കെ.എസ്.യുക്കാരെ തടയുന്നതാണ് കണ്ടതെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു.
യൂത്ത് കോണ്ഗ്രസ് പ്രവര്ത്തകരെ മുഖ്യമന്ത്രിയുടെ ഗണ്മാനും സംഘവും മര്ദിച്ചതിനെ ന്യായീകരിക്കുന്ന നിലപാടാണ് മന്ത്രിമാര് സ്വീകരിച്ചത്. മുഖ്യമന്ത്രിയുടെ വാഹനം തടയുമ്പോഴാണ് പൊലീസ് ഇടപെടലെന്നും കരിങ്കൊടി പ്രതിഷേധത്തെ ആരും എതിര്ക്കുന്നില്ലെന്നുമാണ് മന്ത്രിമാരുടെ നിലപാട്.വാഹനത്തിന് മുമ്പില് ചാടി വീഴുമ്പോള് അപകടമുണ്ടായാലോ എന്ന് ആശങ്കയായിരുന്നു മന്ത്രി കെ. രാജന്.അപകടം ഉണ്ടാക്കാന് ശ്രമിക്കുന്നവരെ മാറ്റുമ്പോള് പിടിവലി ഉണ്ടാകുമെന്നാണ് ആന്റ്ണി രാജു പറഞ്ഞത്.
അതേസമയം, പൊലീസ് സേനയിലെ പേരുകേട്ട ക്രിമിനലുകള്ക്കൊപ്പമാണ് മുഖ്യമന്ത്രിയുടെ യാത്രയെന്ന് പ്രതിപക്ഷ നേതാവ് വി.ഡി സതീശന് ആരോപിച്ചു. പിണറായി വിജയന് സാഡിസ്റ്റ് മനോഭാവമാണെന്നും യൂത്ത് കോണ്ഗ്രസ്, കെഎസ്യു പ്രവര്ത്തകരെ മര്ദിച്ച ഗണ്മാനെയും സുരക്ഷാ ഉദ്യോഗസ്ഥരെയും നേരിടുമെന്നും അദ്ദേഹം പറഞ്ഞു. സമരത്തിന്റെ രൂപം മാറുമെന്നും മുഖ്യമന്ത്രി അതിരു കടക്കുന്നത് തുടര്ന്നാല് പിണറായി വിജയന്റെ ഭാഷയില് പറയുന്ന ജീവന് രക്ഷാപ്രവര്ത്തനം തങ്ങളും ആരംഭിക്കുമെന്നും സതീശന് മുന്നറിയിപ്പ് നല്കി. മുഖ്യമന്ത്രിയുടെ ഗണ്മാന്റെയും സുരക്ഷാ ഉദ്യോഗസ്ഥരുടെയും സഫാരി സ്യൂട്ടിലെ ക്രിമിനലുകളുടെയും വീടും സ്ഥലവും അറിയാമെന്നും കോണ്ഗ്രസ് വിചാരിച്ചാല് ഇവര്ക്ക് വീടുവിട്ടിറങ്ങാനാകില്ലെന്നും അദ്ദേഹം മുന്നറിയിപ്പ് നല്കി.
