മാവേലിക്കര: എബിവിപി പ്രവര്‍ത്തകനായ ചെങ്ങന്നൂര്‍ കോട്ട സ്വദേശി വിശാലിനെ ക്യാമ്പസ് ഫ്രണ്ടുകാര്‍ കൊലപ്പെടുത്തിയ കേസില്‍ പ്രതികളെ സാക്ഷി കോടതിയില്‍ തിരിച്ചറിഞ്ഞു. മാവേലിക്കര അഡീഷണല്‍ സെഷന്‍സ് ജഡ്ജ് എസ്. എസ്. സീന മുമ്പാകെ നടന്ന നടന്ന സാക്ഷി വിസ്താരത്തിലാണ് രണ്ടാം സാക്ഷി ശ്രീജിത്ത് കേസിലെ പന്ത്രണ്ട് പ്രതികളെ തിരിച്ചറിഞ്ഞത്.
സംഭവ കാലത്ത് എബിവിപിയുടെ സംഘടന ചുമതലയില്‍ പ്രവര്‍ത്തിക്കുന്നവരായിരുന്നു താനും കൊല്ലപ്പെട്ട വിശാലുമെന്ന് സാക്ഷി പറഞ്ഞു. വിശാലിനെ കൊലപ്പെടുത്താനായി കരുതിക്കൂട്ടിയെത്തിയ പ്രതികള്‍ വിശാലിനെ കുത്തി മുറിവേല്‍പിച്ചപ്പോള്‍ താന്‍ താങ്ങിയെടുത്തുവെന്നും ആ സമയം തന്നെ പ്രതികള്‍ ഹെല്‍മറ്റ് ഉപയോഗിച്ച് അടിച്ചുവെന്നും വിശാലിനെ കുത്തിയ ആള്‍ തന്റെ പുറത്തും അതീവ ഗുരുതരമായ പരിക്കേല്‍പ്പിച്ചുവെന്നും കേസിലെ സ്‌പെഷ്യല്‍ പ്രോസിക്യൂട്ടര്‍ അഡ്വ. പ്രതാപ് ജി. പടിക്കലിന്റെ ചീഫ് വിസ്താരത്തില്‍ സാക്ഷി മൊഴി നല്കി.
തുടര്‍ന്ന് തൊട്ടടുത്തുള്ള ആശുപത്രിയിലേക്ക് തന്നെ കൊണ്ടുപോയെങ്കിലും പരിക്ക് അതീവ ഗുരുതരമായിരുന്നതിനാല്‍ തുടര്‍ ചികിത്സക്കായി എറണാകുളത്തേക്ക് മാറ്റിയിരുന്നതായും സാക്ഷി പറഞ്ഞു. സംഭവസമയത്ത് കുത്തേറ്റ വിശാലിനെ ഉടന്‍ തന്നെ ചെങ്ങന്നൂര്‍ ഗവ. ആശുപത്രിയില്‍ കൊണ്ടുപോയി എന്നും തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചുവെങ്കിലും വിശാല്‍ മരിച്ചതായും സാക്ഷി പറഞ്ഞു.
വിശാലിനെയും തന്നെയും മറ്റൊരു സാക്ഷിയായ വിഷ്ണു പ്രസാദിനെയും കുത്തിയത് പന്തളം സ്വദേശിയായ ഷെഫീക്ക് എന്നയാള്‍ ആണെന്നും മൊഴി നല്കിയ സാക്ഷി പ്രതിക്കൂട്ടിലുണ്ടായിരുന്ന ഷെഫീക്കിനെയും ഇതര പ്രതികളെയും ചൂണ്ടിക്കാട്ടി തിരിച്ചറിയുകയും ചെയ്തു.
2012 ജൂലൈ 16ന് കോളജിലെ ഒന്നാം വര്‍ഷ ബിരുദ വിദ്യാര്‍ത്ഥികള്‍ക്ക് അദ്ധ്യയനം ആരംഭിക്കുന്ന ദിവസമാണ് വിശാലിനും മറ്റും എതിരെ ക്യാമ്പസ് ഫ്രണ്ടുകാര്‍ ആക്രമണം അഴിച്ചുവിട്ടത്. പ്രതികള്‍ ഉപയോഗിച്ച കത്തി, ഹെല്‍മറ്റ്, വസ്ത്രങ്ങള്‍ തുടങ്ങിയവയും സാക്ഷി കോടതിയില്‍ തിരിച്ചറിഞ്ഞു. കേസില്‍ പ്രോസിക്യൂഷന് വേണ്ടി സ്‌പെഷ്യല്‍ പ്രോസിക്യൂട്ടറിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവന്‍, ഹരീഷ് കാട്ടൂര്‍ എന്നിവരാണ് ഹാജരാകുന്നത്. വിചാരണ വ്യാഴാഴ്ചയും തുടരും.
പ്രതികരിക്കാൻ ഇവിടെ എഴുതുക