കൊച്ചി : ശബരിമലയില് സ്പോട്ട് ബുക്കിംഗ് എണ്ണം നിയന്ത്രിക്കണമെന്ന് ഹൈക്കോടതി. സ്പോട്ട് ബുക്കിംഗ് പരിധി സംബന്ധിച്ച് പത്രക്കുറിപ്പ് ഇറക്കണം. വെര്ച്ചല് ക്യൂ, സ്പോട്ട് ബുക്കിംഗ് ഇല്ലാതെ വരുന്നവരെ സന്നിധാനത്തേക്ക് പറഞ്ഞുവിടേണ്ടതില്ല. സ്പോട്ട് ബുക്കിംഗ് കൂടുതല് ചെയ്യുന്നത് മലയാളികളാണ്.
വെര്ച്വല് ക്യൂ ബുക്കിംഗ് 80000 ആയാല് സ്പോട്ട് ബുക്കിംഗ് 5000 അല്ലെങ്കില് 10000 ആക്കണമെന്ന നിര്ദ്ദേശവും കോടതി മുന്നോട്ട് വെച്ചു.തിരക്ക് കാരണം തീര്ത്ഥാടകര് മണിക്കൂറുകളോളം കാത്ത് കിടക്കുന്ന എരുമേലിയിലെ സ്ഥിതിയെന്താണെന്നും കോടതി ചോദിച്ചു.
ശബരിമലയിലെ അനിയന്ത്രിത തിരക്ക് പ്രതീക്ഷിച്ചതല്ലെന്ന് പറഞ്ഞ ഹൈക്കോടതി ദേവസ്വം ബഞ്ച് സ്ത്രീകളുടെയും കുട്ടികളുടെയും കാര്യത്തില് പ്രത്യേക ശ്രദ്ധ വേണമെന്നും ആവര്ത്തിച്ചു. ശബരിമലയിലേക്കുള്ള പ്രവേശനം ഉചിതമായി ക്രമീകരിക്കണം.
അതേസമയം സന്നിധാനത്ത് ഇന്ന് തിരക്ക് നിയന്ത്രണ വിധേയമാണ്. നിലയ്ക്കലും സ്ഥിതിഗതികള് സാധാരണ നിലയിലായി. മണിക്കൂറില് 3600 മുതല് 4000 പേര് വരെ പതിനെട്ടാം പടി കയറുന്നു.
