രാജ്‌കോട്ട്: രാജ്യത്തെ പ്രധാന ആഭ്യന്തര ഏകദിന ടൂര്‍ണമെന്റ് വിജയ് ഹസാരെ ട്രോഫിയുടെ നോക്കൗട്ട് മത്സരങ്ങള്‍ക്ക് ഇന്ന് തുടക്കം. രണ്ട് പ്രീക്വാര്‍ട്ടര്‍ മത്സരങ്ങളാണ് ഇന്ന് ഷെഡ്യൂള്‍ ചെയ്തിരിക്കുന്നത്. കേരളം മഹാരാഷ്‌ട്രയെ നേരിടുമ്പോള്‍ ബംഗാള്‍ ഗുജറാത്തിനെതിരെ ഇറങ്ങും.
ഗ്രൂപ്പ് എയില്‍ മികച്ച പ്രകടനവുമായി നിലകൊണ്ട കേരളം കരുത്തരായ മുംബൈയ്‌ക്കെതിരെ പരാജയപ്പെട്ടതിനാലാണ് ക്വാര്‍ട്ടറിലേക്ക് യോഗ്യത നേടാനാകാതെ വന്നത്. പോയിന്റ് അടിസ്ഥാനത്തില്‍ മുംബൈയും കേരളവും തുല്യരാണ്. റണ്‍നിരക്കിലും കേരളമാണ് മുന്നില്‍. പക്ഷെ ടൂര്‍ണമെന്റ് നിയമം പ്രകാരം ഇരുവരും തമ്മില്‍ കളിച്ച മത്സരത്തില്‍ പരാജയപ്പെട്ട കേരളം രണ്ടാം സ്ഥാനക്കാരായി. നേരിട്ട് ക്വാര്‍ട്ടറിലേക്ക് മുന്നേറിയ മുംബൈ തിങ്കളാഴ്ച തമിഴ്‌നാടിനെ നേരിടും. രണ്ടാം സ്ഥാനക്കാരാകേണ്ടിവന്നതിനാല്‍ കേരളത്തിന് ക്വാര്‍ട്ടറിലേക്ക് മുന്നേറാന്‍ പ്രീക്വാര്‍ട്ടര്‍ കളിച്ചേ മതിയാകൂ. ഇന്നത്തെ കളിയില്‍ മഹാരാഷ്‌ട്രയെ തോല്‍പ്പിച്ചാല്‍ ക്വാര്‍ട്ടറില്‍ കേരളത്തിന് നേരിടേണ്ടിവരിക രാജസ്ഥാനെയായിരിക്കും.
ഇന്ന് നടക്കുന്ന മറ്റൊരു പ്രീക്വാര്‍ട്ടര്‍ മത്സരത്തില്‍ ബംഗാളും ഗുജറാത്തും തമ്മിലാണ്. ഇതില്‍ ജയിക്കുന്നവര്‍ക്ക് ക്വാര്‍ട്ടറില്‍ ഹര്യാനയെ ആയിരിക്കും നേരിടേണ്ടിവരിക. മറ്റന്നാള്‍ നടക്കുന്ന ക്വാര്‍ട്ടര്‍ മത്സരത്തിലെ മറ്റ് രണ്ട് കളികളില്‍ ഒന്നില്‍ വിദര്‍ഭ കര്‍ണാടകയെ നേരിടും. ഇതേ ദിവസം നടക്കുന്ന മറ്റൊരു ക്വാര്‍ട്ടറില്‍ മുംബൈയും തമിഴ്‌നാട്ടും തമ്മില്‍ ഏറ്റുമുട്ടും.
പ്രതികരിക്കാൻ ഇവിടെ എഴുതുക: