ഋതുരാജ് റിക്കാര്‍ഡ് ബുക്കില്‍

ബെംഗളൂരു: ഓസ്‌ട്രേലിയക്കെതിരായ അഞ്ചാം ടി 20യിലും വിജയം നേടി പരമ്പര 4-1ന് സ്വന്തമാക്കിയ മത്സരത്തില്‍ ഒരു റിക്കാര്‍ഡ് സ്വന്തമാക്കി ഭാരത ബാറ്റര്‍ ഋതുരാജ് ഗെയ്‌ക്ക്‌വാദ്.

അവസാന കളിയില്‍ 10 റണ്‍സെടുത്ത് പുറത്തായെങ്കിലും ഓസ്‌ട്രേലിയക്കെതിരായ ടി20 പരമ്പരയില്‍ ഏറ്റവും കൂടുതല്‍ റണ്‍സടിച്ച ബാറ്ററെന്ന റിക്കാര്‍ഡാണ് ഋതുരാജ് സ്വന്താക്കിയത്. ഇന്നലെ 10 റണ്‍സെടുത്തതോടെ ഈ പരമ്പരയില്‍ ഋതുരാജിന്റെ റണ്‍നേട്ടം 223 റണ്‍സായി. 2021ല്‍ ഓസ്‌ട്രേലിയക്കെതിരായ ടി20 പരമ്പരയില്‍ 218 റണ്‍സടിച്ചിരുന്ന ന്യൂസിലന്‍ഡ് ഓപ്പണര്‍ മാര്‍ട്ടിന്‍ ഗുപ്ടിലിന്റെ പേരിലുണ്ടായിരുന്ന റിക്കാര്‍ഡാണ് ഋതുരാജ് മറികടന്നത്.

അവസാന കളിയില്‍ ഒന്‍പത് റണ്‍സ് കൂടി നേടിയിരുന്നെങ്കില്‍ മറ്റൊരു റിക്കാര്‍ഡ് കൂടി ഋതുരാജിന് സ്വന്തമാക്കാന്‍ കഴിയുമായിരുന്നു. എന്നാല്‍ അതിന് കഴിയാതെ പോയതോടെ ദ്വിരാഷ്‌ട്ര ടി20 പരമ്പരയില്‍ ഏറ്റവും കൂടുതല്‍ റണ്‍സ് നേടുന്ന ഭാരത താരമെന്ന റിക്കാര്‍ഡാണ് ഋതുരാജിന് നഷ്ടമായത്. ദ്വിരാഷ്‌ട്ര പരമ്പരകളിലെ റണ്‍വേട്ടയില്‍ കോഹ്‌ലി (231 റണ്‍സ്) ഒന്നാമതും കെ.എല്‍. രാഹുല്‍ (224 റണ്‍സ്) രണ്ടാമതുമാണ്. ഓസ്‌ട്രേലിയക്കെതിരായ പരമ്പരയില്‍ 55.75 ശരാശരിയില്‍ 223 റണ്‍സടിച്ച റുതുരാജ് മൂന്നാം സ്ഥാനത്തുണ്ട്.

പരമ്പരയിലെ ആദ്യ മത്സരത്തില്‍ ഒരു പന്തുപോലും നേരിടാതെ റണ്ണൗട്ടായി ഡയമണ്ട് ഡക്കായ ഋതുരാജ് പിന്നീട് ഒരു സെഞ്ചുറിയും ഒരു അര്‍ധസെഞ്ചുറിയും നേടിയാണ് റണ്‍വേട്ടയില്‍ ഒന്നാമനായത്. 0, 58, 123*, 32, 10 എന്നിങ്ങനെയായിരുന്നു ഓസ്‌ട്രേലിയക്കെതിരെ ഋതുരാജിന്റെ പ്രകടനം. നേരത്തെ പരമ്പരക്കിടെ ടി 20 ക്രിക്കറ്റില്‍ അതിവേഗം 4000 റണ്‍സ് തികക്കുന്ന ഇന്ത്യന്‍ താരമായിരുന്നു ഋതുരാജ്. 116 ഇന്നിങ്‌സുകളില്‍ നിന്നാണ് ഋതുരാജ് ഐപിഎല്ലിലും ആഭ്യന്തര ക്രിക്കറ്റിലും രാജ്യാന്തര ക്രിക്കറ്റിലുമായി 4000 റണ്‍സടിച്ചത്. 117 ഇന്നിംഗ്‌സില്‍ 4000 റണ്‍സടിച്ച കെ.എല്‍. രാഹുലിനെയാണ് ഋതുരാജ് മറികടന്നത്. 138 ഇന്നിംഗ്‌സില്‍ 4000 തികച്ച കോഹ്‌ലി മൂന്നാമതാണ്.