കൊല്ലം: ഓയൂരിൽ നിന്നും ആറു വയസ്സുകാരി അബിഗേലിനെ തട്ടിക്കൊണ്ടുപോയ സംഘത്തിലെ യുവതിയെക്കുറിച്ച് വിവരം ലഭിച്ചതായി സൂചന. കൊല്ലം മെഡിക്കൽ കോളേജിന് സമീപം മൈലവിളയിൽ വാടകയ്ക്ക് താമസിക്കുന്നയാളാണെന്നാണ് വിവരം. ഇവിടെ പോലീസ് സംഘം പരിശോധനയ്‌ക്കായി എത്തിയിട്ടുണ്ട്.
ഇന്നലെ തട്ടിക്കൊണ്ടുപോയ കുട്ടിയെ ഇന്ന് ഉച്ചയോടെ കൊല്ലം ആശ്രാമം മൈതാനത്ത് ഉപേക്ഷിച്ച നിലയിൽ കണ്ടെത്തുകയായിരുന്നു. ഒരു ഓട്ടോ റിക്ഷയിലാണ് ഈ സ്ത്രീ കുട്ടിയേയും കൊണ്ട് ആശ്രാമത്തെത്തിയത്. ഇവിടെ ഒരു ബഞ്ചിൽ കുട്ടിയെ ഇരുത്തിയ ശേഷം സ്ത്രീ കടന്നു കളയുകയായിരുന്നു. ഇവിടെ ഉണ്ടായിരുന്ന എസ് എൻ കോളേജ് വിദ്യാർത്ഥിനി ധനഞ്ജയ എന്ന പെൺകുട്ടിയാണ് കുട്ടിയെ തിരിച്ചറിഞ്ഞത്.
ധനഞ്ജയ പരീക്ഷ കഴിഞ്ഞ് വരുന്നതിനിടയിലാണ് കുട്ടിയെ ഒരു സ്ത്രീ കൊണ്ടുവരുന്നത് കണ്ടത്. കുട്ടി മാസ്ക് ധരിച്ചിരുന്നതിനാൽ ആദ്യം തിരിച്ചറിയാൻ കഴിഞ്ഞില്ല. എന്നാൽ കുട്ടിയെ അവിടെ കൊണ്ടുവന്നിരുത്തിയ സ്ത്രീ പോയശേഷം തിരിച്ചു വരാതിരുന്നതോടെ സംശയം തോന്നുകയായിരുന്നു. തുടർന്നാണ് മാദ്ധ്യമങ്ങളിലൂടെ കണ്ട ഫോട്ടോ നോക്കി തട്ടിക്കൊണ്ടുപോയ കുട്ടി തന്നെയാണെന്ന് ഉറപ്പാക്കിയത്. തുടർന്ന് പിങ്ക് പോലീസിനെ വിവരം അറിയിക്കുകയായിരുന്നു.
പ്രതികരിക്കാൻ ഇവിടെ എഴുതുക: