തിരുവനന്തപുരം: മസ്തിഷ്ക മരണമടഞ്ഞ തമിഴ്നാട് കന്യാകുമാരി വിളവിന്കോട് സ്വദേശി സെല്വിന് ശേഖറിന്റെ (36) അവയവങ്ങള് അതീവ ദുഃഖത്തിലും ദാനം ചെയ്യാന് തയാറായ, സ്റ്റാഫ് നഴ്സ് കൂടിയായ ഭാര്യ ഗീതയെ മന്ത്രി വീണാ ജോര്ജ് നന്ദിയറിയിച്ചു. ഹൃദയം, വൃക്കകള്, പാന്ക്രിയാസ്, കണ്ണുകള് എന്നിങ്ങനെയാണ് ദാനം നല്കിയത്.
ഹൃദയം ലിസി ഹോസ്പിറ്റലിലെ രോഗിക്കും ഒരു വൃക്ക കിംസ് ആശുപത്രിയിലെ രോഗിക്കും ഒരു വൃക്കയും പാന്ക്രിയാസും ആസ്റ്റര് മെഡിസിറ്റിയിലെ രോഗികള്ക്കുമാണ് നല്കുന്നത്. കണ്ണുകള് തിരുവനന്തപുരം കണ്ണാശുപത്രിയിലെ രണ്ട് രോഗികള്ക്ക് നല്കും. തമിഴ്നാട്ടിലെ ആശുപത്രിയിലെ സ്റ്റാഫ് നഴ്സായിരുന്നു സെല്വിന് ശേഖര്.
കടുത്ത തലവേദന വന്നതിനെ തുടര്ന്ന് അവിടത്തെ ആശുപത്രിയിലും നവംബര് 21ന് കിംസിലും സെല്വിന് ശേഖര് ചികിത്സ തേടിയിരുന്നു. പരിശോധനയില് തലച്ചോറില് രക്തസ്രാവമുണ്ടെന്ന് കണ്ടെത്തി. ചികിത്സകള് തുടരവേ 24ന് മസ്തിഷ്ക മരണമടയുകയായിരുന്നു. അവയവദാനത്തിന്റെ പ്രാധാന്യമറിയുന്ന ഭാര്യയാണ് അതിന് സന്നദ്ധതയറിയിച്ചത്. അവയവ വിന്യാസം വേഗത്തിലാക്കാനായി മുഖ്യമന്ത്രിയുടെ നിര്ദേശപ്രകാരം ഹെലികോപ്റ്ററിലാണ് അവ എത്തിച്ചത്.
