ന്യൂദല്ഹി: പാഠപുസ്തകങ്ങളില് രാമായണവും മഹാഭാരതവും ഉള്പ്പെടുത്തണമെന്ന് എന്സിഇആര്ടി ഉന്നതതല പാനലിന്റെ ശിപാര്ശ. ഭരണഘടനയുടെ ആമുഖം ക്ലാസ് മുറികളില് എഴുതിവയ്ക്കണമെന്നും ശിപാര്ശയില് പറയുന്നു. സോഷ്യല് സയന്സ് പാനല് കമ്മിറ്റി തലവന് പ്രൊഫ. സി.ഐ ഐസക്കാണ് ഇക്കാര്യം അറിയിച്ചത്.
രാമായണവും മഹാഭാരതവും ഏഴാം ക്ലാസ് മുതല് പന്ത്രണ്ടാം ക്ലാസ് വരെയുള്ള സാമൂഹ്യശാസ്ത്ര പാഠ്യപദ്ധതിയുടെ ഭാഗമാക്കുന്നതിന് കമ്മിറ്റി നിര്ദേശം നല്കിയിട്ടുണ്ട്. ഇതിലൂടെ വിദ്യാര്ഥികളില് ദേശസ്നേഹവും സ്വാഭിമാനവും വളര്ത്തിയെടുക്കാമെന്നാണ് കരുതുന്നത്. പ്രതിവര്ഷം ആയിരക്കണക്കിന് വിദ്യാര്ഥികളാണ് രാജ്യംവിട്ട് മറ്റ് രാജ്യങ്ങളില് പൗരത്വം തേടുന്നത്. ഇത്തരം പ്രവണതകള് ദേശസ്നേഹത്തിന്റെ അഭാവം മൂലമാണെന്ന് സി.ഐ. ഐസക്ക് പറഞ്ഞു.
നിലവില് ചില വിദ്യാഭ്യാസ ബോര്ഡുകള് രാമായണം പഠിപ്പിക്കുന്നുണ്ട്. എന്നാല് മിത്തെന്ന രീതിയിലാണ് വിഷയം പഠിപ്പിക്കുന്നത്. ഇതിഹാസങ്ങള് വിദ്യാര്ഥികളെ പഠിപ്പിച്ചില്ലെങ്കില് രാജ്യത്തെ വിദ്യാഭ്യാസ സമ്പ്രദായത്തിന്റെ ഉദ്ദേശ്യം മറ്റെന്താണെന്നും അദ്ദേഹം ചോദിച്ചു.
