ശബരിമല തീർത്ഥാടകർ സഞ്ചരിച്ച ബസ് മറിഞ്ഞ് അപകടം; ഏഴ് പേർക്ക് പരിക്കേറ്റു

പത്തനംതിട്ട: ശബരിമല തീർത്ഥാടകർ സഞ്ചരിച്ച ബസ് മറിഞ്ഞ് അപകടം. ളാഹയ്‌ക്കും പതുക്കടയ്‌ക്കും ഇടയിലാണ് ബസ് മറിഞ്ഞത്. സംഭവത്തിൽ ഒരു കുട്ടി ഉൾപ്പെടെ ഏഴ് അയ്യപ്പ ഭക്തർക്കാണ് പരിക്കേറ്റത്. ആരുടെയും പരിക്ക് ഗുരുതരമല്ല.

ഇന്ന് പുലർച്ചെ 5.30-ഓടെയാണ് സംഭവം. ആന്ധ്രയിൽ നിന്നുള്ള തീർത്ഥാടകർ സഞ്ചരിച്ച വാഹനമാണ് അപകടത്തിൽപ്പെട്ടത്. 34 അയ്യപ്പഭക്തരാണ് വാഹനത്തിലുണ്ടായിരുന്നത്. ദർശശേഷം മലയിറങ്ങി മടങ്ങവെയായിരുന്നു അപകടം. ബസ് റോഡിലെ ഡിവൈഡറിൽ തട്ടി മറിയുകയായിരുന്നുവെന്നാണ് ലഭ്യമാകുന്ന വിവരം.