ജയ്പൂര്‍: നരേന്ദ്രമോദി സര്‍ക്കാര്‍ അധികാരത്തിലെത്തിയതോടെ അന്തര്‍ദേശീയ തലത്തില്‍ ഭാരതത്തിന്റെ യശസ്സ് ഉയര്‍ന്നതായി കേന്ദ്രപ്രതിരോധമന്ത്രിയും മുതിര്‍ന്ന ബിജെപി നേതാവുമായ രാജ്നാഥ് സിങ്. ഷാപുരയില്‍ തെരഞ്ഞെടുപ്പ് റാലിയെ അഭിസംബോധന ചെയ്യുകയായിരുന്നു അദ്ദേഹം.
നരേന്ദ്രമോദി പ്രധാനമന്ത്രി പദത്തില്‍ എത്തിയതോടെ അന്തര്‍ദേശീയ തലത്തില്‍ ഭാരതത്തിന് ലഭിക്കുന്ന സ്വീകാര്യത വര്‍ദ്ധിച്ചു. വിവിധ വിഷയങ്ങളില്‍ ഭാരതത്തിന്റെ അഭിപ്രായത്തിനായി ലോകരാഷ്‌ട്രങ്ങള്‍ കാത്തിരിക്കുന്ന രീതിയിലേക്ക് കാര്യങ്ങള്‍ എത്തി. ഭാരതം ഇപ്പോള്‍ ദുര്‍ബലമല്ല, ഭാരതം പറയുന്നത് ലോകം ശ്രദ്ധയോടെ കേള്‍ക്കുമെന്നും അദ്ദേഹം പറഞ്ഞു.
അമ്മമാര്‍ക്കും സഹോദരിമാര്‍ക്കും സുരക്ഷ നല്‍കാന്‍ കഴിയാത്ത ആര്‍ക്കും ഭരിക്കാന്‍ അവകാശമില്ലെന്ന് രാജ്നാഥ് സിങ് പറഞ്ഞു. സ്ത്രീകള്‍ക്കും പെണ്‍കുട്ടികള്‍ക്കും നേരെയുള്ള അതിക്രമങ്ങള്‍ അശോക് ഗെഹ്ലോട്ട് സര്‍ക്കാരിന് കീഴില്‍ രാജസ്ഥാനില്‍ വര്‍ധിച്ചുവരുന്നത് ചൂണ്ടിക്കാട്ടിയായിരുന്നു ഇത്.
സര്‍ക്കാര്‍ രൂപീകരിക്കാന്‍ വേണ്ടി മാത്രമല്ല, നല്ല സമൂഹത്തെയും രാജ്യത്തെയും കെട്ടിപ്പടുക്കാന്‍ കൂടിയാണ് തെരഞ്ഞെടുപ്പ്. ജാതി, മതം, മതം എന്നിവയുടെ അടിസ്ഥാനത്തിലല്ല, മാനവികതയില്‍ അധിഷ്ഠിതമായാണ് ഭരണം നടത്തേണ്ടതെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: