ഹൈദരാബാദ്: കുടുംബവാഴ്ചയും അഴിമതി രാഷ്ട്രീയവും കൊണ്ട് തെലങ്കാനയിലെ ജനങ്ങള്‍ പൊറുതിമുട്ടിയെന്ന് ബിജെപി നേതാവ് ഖുശ്ബു സുന്ദര്‍. ബിആര്‍എസിനെ ജനങ്ങള്‍ക്ക് മടുത്തു.
അവര്‍ മാറ്റത്തിനായി ആഗ്രഹിക്കുന്നു, അവര്‍ എഎന്‍ഐയോട് പറഞ്ഞു. ഹൈദരാബാദിലെ ജൂബിലി ഹില്‍സ് മണ്ഡലത്തില്‍ ബിജെപിക്ക് വേണ്ടി ഗൃഹസമ്പര്‍ക്ക പരിപാടിക്കെത്തിയതായിരുന്നു ഖുശ്ബു. ജനങ്ങള്‍ പ്രധാനമന്ത്രി നരേന്ദ്ര മോദിയെ കാണുന്നുണ്ട്.
രാജ്യത്തെ ഭരണം അവര്‍ അനുഭവിക്കുന്നു. വികസനവും അഴിമതിരഹിത ഭരണവും അവരുടെ കണ്‍മുന്നിലുണ്ട്. മോദിയില്‍ അവര്‍ക്ക് വിശ്വാസമുണ്ട്. പിന്നെന്തിന് അവര്‍ മാറ്റം കൊതിക്കാതിരിക്കണം, ഖുശ്ബു ചോദിച്ചു.
തെലങ്കാനയില്‍ അന്തരീക്ഷം വ്യക്തമാണ്. കോണ്‍ഗ്രസും ബിആര്‍എസും തമ്മിലൊരു വ്യത്യാസവുമില്ല. രണ്ടും കുടുംബപാര്‍ട്ടികളാണ്. സ്വന്തക്കാര്‍ക്ക് വേണ്ടിയാണ് പ്രവര്‍ത്തിക്കുന്നത്. അഴിമതിയാണ് രണ്ടു കൂട്ടര്‍ക്കും പ്രാണവായു.
അതുകൊണ്ടുതന്നെ ഇക്കുറി അവര്‍ തീരുമാനമെടുത്തിട്ടുണ്ട്. ബിജെപി സ്ഥാനാര്‍ത്ഥിക്ക് നല്കുന്ന വോട്ട് പ്രധാനമന്ത്രി നരേന്ദ്രമോദിക്ക് നല്കുന്ന പിന്തുണയാണെന്ന് ജനങ്ങള്‍ക്ക് ബോധ്യമുണ്ട്, ഖുശ്ബു പറഞ്ഞു.
പ്രതികരിക്കാൻ ഇവിടെ എഴുതുക: