കോട്ടയം: സിനിമ, സീരിയൽ നടൻ മീനടം കുറിയന്നൂർ വിനോദ് തോമസിന്റെ മരണം കാറിനുള്ളിലെ വിഷവാതകം ശ്വസിച്ചാണെന്ന പ്രാഥമിക നിഗമനത്തിൽ അന്വേഷണ സംഘം. എന്നാൽ പോസ്റ്റ്മോർട്ടം റിപ്പോർട്ട് പുറത്ത് വന്നാൽ മാത്രമെ ഇക്കാര്യം സ്ഥിരീകരിക്കാനാകൂ. കാറിലെ എസിയിൽ നിന്നും പുറത്ത് വന്ന വിഷവാതകം ശ്വസിച്ചതാകാം മരണകാരണമെന്നാണ് നിഗമനം.
ഇന്നലെ വൈകിട്ടോടെ പാമ്പാടിയിൽ പ്രവർത്തിക്കുന്ന ഡ്രീംലാൻഡ് ബാറിന് മുന്നിൽ പാർക്ക് ചെയ്ത കാറിനുള്ളിൽ വിനോദിനെ മരിച്ച നിലയിൽ കണ്ടെത്തുകയായിരുന്നു. കാറിൽ കയറിയ വിനോദ് ഏറെ നേരമായിട്ടും പുറത്തിറങ്ങാതിരുന്നതിനെ തുടർന്ന് ബാർ ജീവനക്കാർ നടത്തിയ തിരച്ചിലാലണ് അദ്ദേഹത്തെ അബോധാവസ്ഥയിൽ കണ്ടെത്തിയത്.
ഉടൻ തന്നെ പോലീസിൽ വിവരം അറിയിച്ചു. പോലീസ് എത്തി ഡോറിന്റെ ചില്ല് തകർത്ത് വിനോദിനെ പുറത്തെടുക്കുകയായിരുന്നു. ഉടൻ തന്നെ പാമ്പാടിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
