പാളയം ബസ് സ്റ്റാന്റിൽ മയക്കുമരുന്ന്-ഗുണ്ടാ സംഘങ്ങളുടെ വിളയാട്ടം; രണ്ട് പേർ അറസ്റ്റിൽ

കോഴിക്കോട്: പാളയം ബസ് സ്റ്റാന്റിൽ പോലീസിനെയും ജനങ്ങളെയും മുൾ മുനയിൽ നിർത്തി അഴിഞ്ഞാടിയ ഗുണ്ടാസംഘം പിടിയിൽ. മണിക്കൂറുകളോളം പ്രദേശത്ത് അഴിഞ്ഞാടിയ സംഘത്തെ എസ്‌ഐ ജഗമോഹൻ ദത്തന്റെ നേതൃത്വത്തിലുള്ള കസബ പോലീസും സിറ്റി ക്രൈം സ്‌ക്വാഡും അതിസാഹസികമായി കീഴ്‌പ്പെടുത്തുകയായിരുന്നു. രണ്ട് പേരെയാണ് പോലീസ് അറസ്റ്റ് ചെയ്തത്.

മയക്കുമരുന്ന് കേസുകളിൽ സ്ഥിരം പ്രതിയായ ജിതിൻ റൊസാരിയോ, അടിപിടി കേസുകളിലെയും കാപ്പ ചുമത്തിയ പ്രതിയുമായ അക്ഷയ് എന്നിവരെയാണ് കസബ പോലീസ് അറസ്റ്റ് ചെയ്തത്. പാളയം മാർക്കറ്റിൽ ഗുണ്ടാസംഘങ്ങളും മയക്കുമരുന്ന് സംഘങ്ങളും രാത്രികാലങ്ങളിൽ തമ്പടിക്കുന്നുവെന്ന് രഹസ്യ വിവരം ലഭിച്ചിരുന്നു.

ഇത് സംബന്ധിച്ച് അന്വേഷണത്തിനെത്തിയ ഉദ്യോഗസ്ഥരെ തെറി വിളിക്കുകയും കയ്യേറ്റം ചെയ്യുകയും ചെയ്തു. തുടർന്നാണ് സ്ഥലത്ത് കൂടുതൽ പോലീസ് എത്തി ബലപ്രയോഗത്തിലൂടെ പ്രതികളെ പിടികൂടിയത്.