തൃശ്ശൂർ: ഗുരുവയൂർ ക്ഷേത്രനടയിൽ കൈക്കുഞ്ഞുമായി മുല്ലപ്പൂ വിൽക്കുന്ന ധന്യയ്ക്ക് സഹായ ഹസ്തവുമായി സുരേഷ് ഗോപി. മകളുടെ വിവാഹത്തിന് ആവശ്യമായ മുല്ലപ്പൂവിന്റെ ഓർഡർ ധന്യയ്ക്ക് നൽകുമെന്ന് അദ്ദേഹം പറഞ്ഞു. നാളെ ഗുരുവായൂരിലെത്തി സുരേഷ് ഗോപി ധന്യയെയും കുടുംബത്തെയും കാണും.
കുടുംബം പോറ്റാൻ ഗുരുവായൂർ ക്ഷേത്ര നടയിൽ മുല്ലപ്പൂവ് വിൽക്കുന്ന ധന്യയുടെ ദുരിത ജീവിതം സമൂഹമാദ്ധ്യമങ്ങളിൽ വ്യാപകമായി പ്രചരിച്ചിരുന്നു. ഇതിന് പിന്നാലെ ഒരു മാധ്യമം ധന്യയുടെ ദുരിതം വാർത്തയാക്കുകയും ചെയ്തിരുന്നു. ഇത് ശ്രദ്ധയിൽപ്പെട്ടതോടെയാണ് സുരേഷ് ഗോപി സഹായം വാഗ്ദാനം ചെയ്ത് എത്തിയത്. ധന്യയും കുടുംബവും വാടക വീട്ടിലാണ് താമസം. ഭർത്താവ് ഹൃദയ സംബന്ധമായ അസുഖത്തെ തുടർന്ന് ബുദ്ധിമുട്ടുകയാണ്. ഭർതൃമാതാവിനും സുഖമില്ല.
പ്രണയവിവാഹം ആയതിനാൽ നേരത്തെ തന്നെ ധന്യയെ കുടുംബം കയ്യൊഴിഞ്ഞിരുന്നു. ഇതേ തുടർന്നാണ് ക്ഷേത്ര നടയിൽ കുഞ്ഞുമായി മുല്ലപ്പൂ വിൽപ്പന ആരംഭിച്ചത്. പുലർച്ചെ തന്നെ ധന്യ ക്ഷേത്രത്തിൽ എത്തി പൂവിൽപ്പന ആരംഭിക്കും. ക്ഷേത്രത്തിൽ നിന്നു തന്നെ ഭക്ഷണം കഴിക്കും. ഭർത്താവിന് മരുന്ന് വാങ്ങാൻ മാത്രം മാസം എണ്ണായിരത്തോളം രൂപ വേണം.
കഴിഞ്ഞ ദിവസം ക്ഷേമപെൻഷൻ കിട്ടാത്തതിൽ പ്രതിഷേധിച്ച് മൺചട്ടിയുമായി ഭിക്ഷയാചിച്ച മറിയക്കുട്ടിയ്ക്കും അന്നമ്മയ്ക്കും മാസം 1600 രൂപ വീതം ആയുഷ്കാലം താൻ നൽകുമെന്ന് സുരേഷ് ഗോപി വാഗ്ദാനം നൽകിയിരുന്നു.
