സന്നിധാനത്ത് ഇന്നും വൻ ഭക്തജന തിരക്കിന് സാധ്യത; വൃശ്ചികം ഒന്നിന് ദർശനത്തിനെത്തിയത് 45,000-ലേറെ ഭക്തർ

പത്തനംതിട്ട: സന്നിധാനത്ത് ഇന്നലത്തേതിന് സമാനമായി ഇന്നും വലിയ തോതിലുള്ള ഭക്തജന തിരക്ക് അനുഭവപ്പെടാൻ സാധ്യതയെന്ന് വിലയിരുത്തൽ. വൃശ്ചികം ഒന്നിന് 45,000-ൽ അധികം ഭക്തരാണ് ശബരിമലയിലെത്തി ദർശനം നടത്തി മടങ്ങിയത്. ഇന്ന് പുലർച്ചെ 2.30 പള്ളി ഉണർത്തൽ നടന്നു. ശേഷം മൂന്ന് മണിയോടെ തിരുനട തുറക്കുകയും ചെയ്തു.

രാവിലെ എട്ട് മുതൽ 11 വരെയാണ് നെയ്യഭിഷേക സമയം. ഇന്ന് കാലാവസ്ഥ അനുകൂലമായത് ഭക്തർക്ക് അനുകൂലമായിരിക്കും എന്നാണ് വിലയിരുത്തൽ. ഇന്നലെ മുതൽ വലിയ ഭക്തജന തിരക്കാണ് സന്നിധാനത്തുള്ളത്. ഇന്നലെ തന്ത്രി കണ്ഠരര് മഹേഷ് മോഹനരരുടെ സാന്നിധ്യത്തിൽ പുതിയ മേൽശാന്തി പിഎൻ മഹേഷ് നമ്പൂതിരിയാണ് ശ്രീകോവിലിൽ നട തുറന്നത്.

ഉച്ചയ്‌ക്ക് ഒരു മണിയോടെ നട അടയ്‌ക്കും. ഉച്ച തിരിഞ്ഞ് മൂന്ന് മണിയോടെയാകും പിന്നീട് നട തുറക്കുക. രാത്രി 11-ഓടെ ഹരിവരാസനം പാടി നട അടയ്‌ക്കും.