ചാരുംമൂട് (ആലപ്പുഴ): ഏതുവികസനത്തിനു വേണ്ടിയാണെങ്കിലും ഒരു പ്രദേശത്തെ മുഴുവന്‍ ജനങ്ങളേയും ആട്ടി ഓടിച്ച് പ്രകൃതിയുടെ വരദാനമായി കിട്ടിയ മലനിരകളെ കവര്‍ന്നു കൊണ്ടുപോകാനുള്ള ഗൂഡശക്തികളുടെ ലക്ഷ്യം എന്തു വില കൊടുത്തും ചെറുത്തു തോല്‍പ്പിക്കുമെന്ന് ബിജെപി സംസ്ഥാന പ്രസിഡന്റ് കെ.സുരേന്ദ്രന്‍ പറഞ്ഞു. നൂറനാട് മറ്റപ്പള്ളി മലയിലെ മണ്ണെടുപ്പു സ്ഥലം സന്ദര്‍ശിച്ച ശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം.
പാലമേല്‍ നിവാസികളുടെ നിലനില്‍പ്പിനു വേണ്ടിയുള്ളേ പേരാട്ടമാണ് ഇവിടെ നടക്കുന്നത്. ഇതില്‍ രാഷ്‌ട്രീയം കലര്‍ത്തേണ്ട കാര്യമില്ല. സംയുക്ത സമരസമിതിയാണ് എതിര്‍ത്തുനില്‍പ്പിനു വേണ്ടി നേതൃത്വം നല്‍കുന്നത്. മണ്ണെടുപ്പ് ഉപേക്ഷിക്കുന്നതു വരെ സംയുക്ത സമരസമിതിയുടെ ശക്തമായ പോര്‍മുഖത്ത് എന്‍ഡിഎയുടെ സമരഭടന്‍മാര്‍ ഉണ്ടായിരിക്കുമെന്നുംസുരേന്ദ്രന്‍ സംയുക്ത സമരസമിതിക്ക് ഉറപ്പു നല്‍കി. പാലമേല്‍ ഗ്രാമ പഞ്ചായത്ത് പ്രസിഡന്റ് ബി.വിനോദ്, സമരസമിതി നേതാക്കളായ മനോജ് സി. ശേഖര്‍, സജി നൂറനാട്, പ്രഭ വി. മറ്റപ്പള്ളി, വേണു കാവേരി, എ. നൗഷാദ് എന്നിവരുമായി ചര്‍ച്ച നടത്തി.
ബിജെപി മണ്ഡലം പ്രസിഡന്റുമാരായ അഡ്വ.കെ കെ. അനൂപ്, പ്രഭകുമാര്‍ മുകളയ്യത്ത്, മധു ചുനക്കര, മണ്ഡലം കമ്മിറ്റി ഭാരവാഹികള്‍, നൂറനാട് – പാലമേല്‍ പഞ്ചായത്ത് കമ്മിറ്റി ഭാരവാഹികള്‍, മഹിളാ മോര്‍ച്ച ഭാരവാഹികള്‍ തുടങ്ങി നിരവധി പ്രവര്‍ത്തകര്‍ ആശാന്‍ കലുങ്ക് ജങ്ഷനില്‍ വെച്ചു അദ്ദേഹത്തെ സ്വീകരിച്ചു. തുടര്‍ന്ന് കാല്‍നടയായാണ് മണ്ണെടുപ്പു സ്ഥലത്തെത്തിയത്.
പ്രതികരിക്കാൻ ഇവിടെ എഴുതുക: