തിരുവനന്തപുരം: മണ്ഡലകാല മകരവിളക്ക് തീർത്ഥാടനത്തിന് ശബരിമല നട ഇന്ന് തുറക്കും. ഒരുക്കങ്ങളെല്ലാം പൂർത്തിയായെന്ന് ദേവസ്വം ബോർഡ് അറിയിച്ചു. ഇന്ന് വൈകുന്നേരം അഞ്ച് മണിയോടെ തന്ത്രി കണ്ഠരര് മഹേഷ് മോഹനരുടെ സാന്നിദ്ധ്യത്തിൽ മേൽശാന്തി കെ ജയരാമൻ നമ്പൂതിരി നട തുറന്ന് ദീപം തെളിയിക്കും.
പുതിയ ശബരിമല, മാളികപ്പുറം മേൽശാന്തിമാരുടെ അഭിഷേക ചടങ്ങുകൾ ഇന്ന് രാത്രി സന്നിധാനത്ത് വെച്ച് നടക്കും. മൂവാറ്റുപുഴ ഏനാനല്ലൂർ പൂത്തില്ലത്ത് മനയിൽ പിഎൻ മഹേഷ് നമ്പൂതിരിയെ ശബരിമല ക്ഷേത്രം മേൽശാന്തിയായും ഗുരുവായൂർ അഞ്ഞൂർ പൂങ്ങാട്ട്മന പിജി മുരളി നമ്പൂതിരിയെ മാളികപ്പുറം ക്ഷേത്രം മേൽശാന്തിയായും തന്ത്രിക കണ്ഠരര് മഹേഷ് മോഹനരരുടെ കാർമികത്വത്തിൽ സന്നിധാനത്തേക്ക് ആനയിക്കും.
വൃശ്ചികം ഒന്നായ 17-ന് പുലർച്ചെ നാലിന് പുതിയ മേൽശാന്തിമാർ നട തുറക്കും. തുടർന്നുള്ള ദിവസങ്ങളിൽ പുലർച്ചെ നാലിന് തുറക്കുന്ന നട ഉച്ചയ്ക്ക് ഒന്നിന് അടയ്ക്കും. വൈകീട്ട് നാലിന് വീണ്ടും തുറന്ന ശേഷം രാത്രി 11-ന് അടയ്ക്കും.
