കൊച്ചി: അസമയത്ത് വെടിക്കെട്ട് നിരോധിച്ച ഹൈക്കോടതി സിംഗിള് ബെഞ്ച് വിധിക്കെതിരെ അപ്പീലുമായി സംസ്ഥാന സര്ക്കാര്. ഇടക്കാല ഉത്തരവ് റദ്ദാക്കണമെന്ന് ആവശ്യപ്പെട്ടാണ് സര്ക്കാര് ഹൈക്കോടതിയെ സമീപിച്ചത്.
പരിഗണനാ വിഷയത്തിന് അപ്പുറമുള്ള കാര്യങ്ങളാണ് സിംഗിള് ബെഞ്ച് പരിശോധിച്ചതെന്ന് സര്ക്കാര് ഹര്ജിയില് പറയുന്നു.
കോടതി ഉത്തരവില് അസമയം ഏതെന്ന് വ്യക്തമല്ല. ഉത്തരവിനെ വ്യക്തികള് ഇഷ്ടാനുസരണം വ്യാഖ്യാനിക്കും. ക്ഷേത്രോത്സവത്തിനുള്ള വെടിക്കെട്ടിന് 2005 ല് സുപ്രീംകോടതി ഇളവ് നല്കിയിട്ടുണ്ടെന്ന് സര്ക്കാര് ഹര്ജിയില് ചൂണ്ടിക്കാട്ടുന്നു.2006 ല് ഇതില് വ്യക്തത വരുത്തി വീണ്ടും ഉത്തരവിറക്കിയിട്ടുണ്ട്. തൃശൂര് പൂരത്തിനും ആറാട്ട് പുഴ പൂരത്തിനും വെടിക്കെട്ടിന് സുപ്രീം കോടതി അനുമതി നല്കിയിട്ടുണ്ട്.
ഹര്ജിയിലെ ആവശ്യങ്ങളിലുപരി സംസ്ഥാനമെമ്പാടും ബാധകമാകുന്ന ഉത്തരവിടാന് കോടതിക്ക് കഴിയില്ല. ഉത്തരവ് റദ്ദാക്കണമെന്നും സര്ക്കാര് ഹൈക്കോടതിയില് നല്കിയ ഹര്ജിയില് ആവശ്യപ്പെടുന്നു. അപ്പീല് ചൊവ്വാഴ്ച പരിഗണിക്കും.
മരട് കൊട്ടാരം ഭഗവതി ക്ഷേത്രത്തിലെ വെടിക്കെട്ട് നിരോധിക്കണമെന്ന ഹര്ജിയിലായിരുന്നു ജസ്റ്റിസ് അമിത് റാവല് ഉത്തരവ് പുറപ്പെടുവിച്ചത്.
