ന്യൂദല്‍ഹി : ഡിജിറ്റല്‍ പ്ലാറ്റ് ഫോമുകള്‍ വഴി സിനിമകള്‍ പ്രചരിക്കുന്നതിനെതിരെ നടപടികള്‍ക്കെതിരെ നടപടികളുമായി കേന്ദ്ര സര്‍ക്കാര്‍. ഇന്റര്‍നെറ്റിന്റെ വ്യാപനവും സിനിമകള്‍ സൗജന്യമായി കാണാനുള്ള ജനങ്ങളുടെ ആഗ്രഹവുമാണ് പൈറസി പ്രശ്‌നം കൂടാനുള്ള കാരണം. ഇത്തരത്തിലുള്ള കേസുകള്‍ക്കെതിരെ നടപടി സ്വീകരിക്കുന്നതിന്റെ ഭാഗമായി പ്രത്യേകം നോഡല്‍ ഓഫീസര്‍മാരെ നിയോഗിക്കാനും തീരുമാനിച്ചിട്ടുണ്ട്. അടുത്തിടെ പാര്‍ലമെന്റില്‍ പാസാക്കിയ സിനിമാട്ടോഗ്രാഫ് ഭേദഗതി ബില്‍ 2023ന്റെ അടിസ്ഥാനത്തിലാണ് ഈ തീരുമാനം.
സിനിമാ മേഖലക്ക് ഏറെ ആശ്വാസം പകരുന്നതാണ് ഈ വാര്‍ത്ത. ഇതുവരെ പകര്‍പ്പവകാശ നിയമത്തിനും ഐപിസിക്കും കീഴിലുള്ള നിയമ നടപടിയല്ലാതെ പൈറേറ്റഡ് ഫിലിം ഉള്ളടക്കത്തില്‍ നേരിട്ട് നടപടിയെടുക്കാനുള്ള അനുമതി സര്‍ക്കാറിന് ലഭിച്ചിരുന്നില്ല. എന്നാല്‍ സര്‍ക്കാര്‍ നിയമിക്കുന്ന പ്രത്യേക നോഡല്‍ ഓഫീസര്‍മാര്‍ക്ക് പൈറേറ്റഡ് ആയിട്ടുള്ള ഉള്ളടക്കങ്ങള്‍ ഡിജിറ്റല്‍ പ്ലാറ്റ്‌ഫോം വഴി പ്രചരിക്കുന്നത് തടയാന്‍ സാധിക്കും. പൈറസി കാരണം പ്രതിവര്‍ഷം 20,000 കോടി രൂപയുടെ നഷ്ടമാണ് ഇത് സിനിമ വ്യവസായത്തിനുണ്ടാകുന്നത്. ഇത് തടയാനാണ് പുതിയ നടപടി കൈക്കൊണ്ടതെന്ന് കേന്ദ്രമന്ത്രി അനുരാഗ് ഠാക്കൂര്‍ അറിയിച്ചു.
നിലവില്‍ ഇന്‍ഫര്‍മേഷന്‍ ആന്‍ഡ് ബ്രോഡ്കാസ്റ്റിങ് മന്ത്രാലയത്തിലും സെന്‍ട്രല്‍ ബ്യൂറോ ഓഫ് ഫിലിം സര്‍ട്ടിഫിക്കേഷനിലും (സിബിഎഫ്സി) 12 നോഡല്‍ ഓഫീസര്‍മാരെ നിയമിച്ചിട്ടുള്ളത്. സിനിമാ പൈറസിയുമായി ബന്ധപ്പെട്ട് ഏതെങ്കിലും വിധത്തിലുള്ള പരാതികള്‍ ഉണ്ടെങ്കില്‍ ഇവര്‍ക്ക് നല്‍കാം. 48 മണിക്കൂറിനുള്ളില്‍ പരാതിയില്‍ നടപടി കൈക്കൊള്ളുന്നതായിരിക്കും. പരാതി തെളിയിക്കപ്പെട്ടാല്‍ പൈറസി നടത്തുന്നവര്‍ 3 ലക്ഷം മുതല്‍ പൈറസി ചെയ്ത കണ്ടന്റിന്റെ നിര്‍മ്മാണ മൂല്യത്തിന്റെ അഞ്ച് ശതമാനം തുകവരെ പിഴയായി നല്‍കേണ്ടി വരും. അതേസമയം പകര്‍പ്പവകാശം ഇല്ലാത്ത ഒരു സാധാരണ വ്യക്തി പരാതി നല്‍കിയാല്‍ നോഡല്‍ ഓഫീസര്‍ക്ക് പരാതിയുടെ സാധുത നിര്‍ണയിക്കാന്‍ ഹിയറിങ്ങുകള്‍ നടത്താവുന്നതാണ്.
യൂട്യൂബ്, ടെലിഗ്രാം ചാനലുകള്‍, വെബ്സൈറ്റുകള്‍ മറ്റ് ഓണ്‍ലൈന്‍ പ്ലാറ്റ്ഫോമുകള്‍ തുടങ്ങിയ എല്ലാ ഡിജിറ്റല്‍ പ്ലാറ്റ്ഫോമുകള്‍ നോഡല്‍ ഓഫീസറില്‍ നിന്ന് നിര്‍ദ്ദേശങ്ങള്‍ ലഭിച്ച് 48 മണിക്കൂറിനുള്ളില്‍ പൈറേറ്റഡ് ഉള്ളടക്കമുള്ള ഇന്റര്‍നെറ്റ് ലിങ്കുകള്‍ നീക്കം ചെയ്യണമെന്നും ഇന്‍ഫര്‍മേഷന്‍ ആന്‍ഡ് വാര്‍ത്താ വിതരണ മന്ത്രാലയം ആവശ്യപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക: