തിരുവനന്തപുരം: സംസ്ഥാനം കടുത്ത സാമ്പത്തിക പ്രതിസന്ധി നേരിടുമ്പോഴും ഉന്നത വിദ്യാഭ്യാസ വകുപ്പ് മന്ത്രി ആര്. ബിന്ദുവിന് കണ്ണട വാങ്ങാന് 30500 രൂപ പൊതുഖജനാവിൽ നിന്നും അനുവദിച്ച് സർക്കാർ. ഇത് സംബന്ധിച്ച ഉത്തരവ് പുറത്തിറങ്ങി. മുഖ്യമന്ത്രി പിണ റായി വിജയൻ ഇടപെട്ടാണ് തുക ലഭിക്കുന്നത് വേഗത്തിലാക്കിയതെന്നാണ് സൂചന.
ആറുമാസം മുൻപ് മന്ത്രി ബിന്ദു വാങ്ങിയ കണ്ണടയുടെ പണമാണ് നൽകിയിരിക്കുന്നത്. കഴിഞ്ഞ ഏപ്രില് 28 നാണ് മന്ത്രി ആര്.ബിന്ദു പുതിയ കണ്ണട വാങ്ങിയത്. അന്ന് തന്നെ ബില്ല് സഹിതം പണം അനുവദിച്ചുകിട്ടാന് പൊതുഭരണ വകുപ്പിന് മന്ത്രി അപേക്ഷ നല്കി. സര്ക്കാര് കടുത്ത സാമ്പത്തിക പ്രതിസന്ധിയിലായതുകൊണ്ടാവാം പണം അനുവദിച്ചുകിട്ടാന് വൈകി. പരാതിയായതോടെ മുഖ്യമന്ത്രി ഇടപെടുകയായിരുന്നു.
മുമ്പും കണ്ണട വാങ്ങിയ വകയില് സിപിഎം മന്ത്രിമാര് സര്ക്കാരില് നിന്ന് ആനുകൂല്യം പറ്റിയിരുന്നു. കഴിഞ്ഞ മന്ത്രിസഭയില് ആരോഗ്യമന്ത്രിയായിരുന്ന കെകെ ശൈലജ 29000 രൂപയ്ക്കാണ് കണ്ണട വാങ്ങിയത്. സ്പീക്കറായിരുന്ന പി ശ്രീരാമകൃഷ്ണന് 49,900 രൂപയാണ് കണ്ണടയ്ക്ക് വേണ്ടി എഴുതിയെടുത്തത്. അന്നൊന്നും ഇല്ലാത്തവിധം സര്ക്കാര് കടുത്ത സാമ്പത്തിക ഞെരുക്കത്തിലൂടെ കടന്നുപോകുമ്പോഴാണ് സംസ്ഥാനത്തെ ഒരു മന്ത്രി കണ്ണട വാങ്ങിയ തുകപോലും സര്ക്കാരിന്റെ ചെലവില് എഴുതിയെടുക്കുന്നത്.
ക്ഷേമ പെൻഷനുകൾ ഉൾപ്പടെ നൽകാൻ സാമ്പത്തിക പ്രതിസന്ധി മൂലം സർക്കാർ ഏ റെ ബുദ്ധിമുട്ടുമ്പോൾ കണ്ണട വാങ്ങാൻ ചെലവായ തുക സർക്കാർ ചെലവിൽ ഉൾക്കൊള്ളിച്ച് എഴുതിയെടുത്തതിനെതിരെ പലകോണൂകളിൽ നിന്നും ആക്ഷേപം ഉയർന്നിട്ടുണ്ട്. സംസ്ഥാനം കടുത്ത സാമ്പത്തിക പ്രതിസന്ധിയിലൂടെയാണ് കടന്നുപോകുന്നതെന്ന് അടുത്തിടെ സർക്കാർ ഹൈക്കോടതിയിൽ സത്യവാങ്മൂലം സമർപ്പിച്ചിരുന്നു. ഇതിനെ രൂക്ഷമായ ഭാഷയിലാണ് കോടതി വിമർശിച്ചത്.
