തൃശൂർ ഗിരിജ തിയേറ്ററില് നടൻ സുരേഷ് ഗോപിക്ക് വമ്പൻ സ്വീകരണമൊരുക്കി ആരാധകർ. തിയേറ്ററിൽ വനിതകൾക്കായി ഒരുക്കിയ, ‘ഗരുഡൻ’ സിനിമയുടെ പ്രത്യേക ഷോ കാണാൻ എത്തിയതായിരുന്നു സുരേഷ് ഗോപി. വലിയ ആവേശത്തോടെയാണ് സ്ത്രീകളടക്കമുള്ള പ്രേക്ഷകര് സുരേഷ് ഗോപിയെ സ്വീകരിച്ചത്. അദ്ദേഹത്തെ ആലിംഗനം ചെയ്യാൻ കുട്ടികളടക്കമുള്ളവരുടെ നീണ്ട നിരതന്നെ ഉണ്ടായിരുന്നു.
സിനിമയ്ക്കു കിട്ടുന്നത് വലിയ പിന്തുണയാണെന്ന് സുരേഷ് ഗോപി മാധ്യമങ്ങളോട് പറഞ്ഞു. അതൊരു ഈശ്വരാനുഗ്രഹമാണെന്നും ആ അനുഗ്രഹം സസന്തോഷം അനുഭവിച്ചുകൊണ്ടിരിക്കുകയാണെന്നും താരം പറഞ്ഞു. ‘‘ഗരുഡൻ പറന്നുയരുകയാണ്. അത് നാട് ആഘോഷിക്കുമ്പോൾ സന്തോഷത്തോടെയാണ് ഞാൻ പങ്കെടുക്കുന്നത്. ആ സന്തോഷത്തിൽ നിങ്ങളും ആസ്വദിക്കുക. ഇതൊരു ഇൻഡസ്ട്രിയുടെ വിജയം കൂടിയാണ്. ഇന്ന് പാലായിലും നൂറനാടും ആറ്റിങ്ങലും പോകുന്നുണ്ട്.’’–സുരേഷ് ഗോപി പറഞ്ഞു.
തൃശൂരിലെ വനിതകൾ വിളിച്ചു, താൻ വന്നുവെന്നും അദ്ദേഹം വ്യക്തമാക്കി. ഈ ഗിരിജ തിയേറ്ററും ഒരു വനിതയുടെ പ്രയത്നമാണ്. ഗിരിജ തിയേറ്ററിനു പ്രതിസന്ധിയുണ്ടായപ്പോൾ ഉടമയുമായി സംസാരിച്ചിരുന്നുവെന്നും താരം പറഞ്ഞു.
