കൊല്‍ക്കത്ത: ബംഗ്ലാദേശിനെതിരായ ലോകകപ്പ് മത്സരത്തിന് മുന്നോടിയായി പാകിസ്ഥാന്‍ ക്രിക്കറ്റ് ടീം തങ്ങള്‍ താമസിക്കുന്ന ഹോട്ടലില്‍ അത്താഴം കഴിക്കുന്നത് ഒഴിവാക്കുകയും പകരം സൊമാറ്റോ ആപ്പ് വഴി ഭക്ഷണം ഓര്‍ഡര്‍ ചെയ്യുകയും ചെയ്തു. കൊല്‍ക്കത്തയിലെ സംസം റെസ്റ്റോറന്റില്‍ നിന്ന് അവര്‍ ബിരിയാണിയും കബാബും ചാപ്പും ഓര്‍ഡര്‍ ചെയ്തു.
പഞ്ചനക്ഷത്ര ഹോട്ടലിലെ ഭക്ഷണം ഒഴിവാക്കാന്‍ പാകിസ്ഥാന്‍ ടീം തീരുമാനിച്ചത് എന്തുകൊണ്ടാണെന്ന് വ്യക്തമല്ല.ഓര്‍ഡര്‍ പാകിസ്ഥാന്‍ ക്രിക്കറ്റ് ടീമിന്റേതാണെന്ന് ആദ്യം അറിയില്ലായിരുന്നുവെന്നും എന്നാല്‍ പിന്നീടാണ് ഇക്കാര്യം അറിഞ്ഞതെന്നും സംസം റെസ്റ്റോറന്റിന്റെ ഡയറക്ടര്‍ ഷാദ്മാന്‍ ഫൈസ് പറഞ്ഞു.
‘ഓണ്‍ലൈന്‍ ഫുഡ് ഡെലിവറി പ്ലാറ്റ്ഫോം വഴിയാണ് ഓര്‍ഡര്‍ വന്നത്. അവര്‍ ബിരിയാണി, കബാബ്, ചാപ്പ് എന്നിങ്ങനെ മൂന്ന് വിഭവങ്ങള്‍ ഓര്‍ഡര്‍ ചെയ്തു. ഞായറാഴ്ച വൈകുന്നേരം 7 മണിക്ക് ശേഷമാണ് അത് ഓര്‍ഡര്‍ ചെയ്തത്. ആദ്യം, ഈ ഓര്‍ഡര്‍ പാകിസ്ഥാന്‍ ക്രിക്കറ്റ് ടീമില്‍ നിന്നാണെന്ന് ഞങ്ങള്‍ക്ക് അറിയില്ലായിരുന്നു. പിന്നീട് ഞങ്ങള്‍ അത് അറിഞ്ഞു. അവര്‍ക്ക് ഭക്ഷണം ഇഷ്ടപ്പെട്ടുവെന്ന് ഞാന്‍ പ്രതീക്ഷിക്കുന്നു. കൊല്‍ക്കത്തയ്‌ക്ക് അതിന്റേതായ ബിരിയാണി രുചിയുണ്ട്. അത് ലോകമെമ്പാടും വളരെ പ്രശസ്തമാണ്,’ ഷാദ്മാന്‍ പറഞ്ഞു.
അതേസമയം, പാകിസ്ഥാന്‍ ടീമിന്റെ ഭക്ഷണ ശീലങ്ങളെ രൂക്ഷമായി വിമര്‍ശിച്ച് മുന്‍ ഫാസ്റ്റ് ബൗളറും മുന്‍ നായകനുമായ വസീം അക്രം രംഗത്ത് വന്നു. പാകിസ്ഥാന്‍ ആസ്ഥാനമായുള്ള എ സ്പോര്‍ട്സ് ചാനലിലെ ഒരു മത്സരാനന്തര ഷോയില്‍, ടീം ദിവസവും കിലോ കണക്കിന് മാംസം കഴിക്കുന്നതായി തോന്നുന്നുവെന്ന് അക്രം പറഞ്ഞു. പാകിസ്ഥാന്റെ മോശം പ്രകടനത്തെ തുടര്‍ന്നാണ് അക്രം വിമര്‍ശനം ഉന്നയിച്ചത്.
പ്രതികരിക്കാൻ ഇവിടെ എഴുതുക: