കൊച്ചി: ഏജസ് ഫെഡറല്‍ ലൈഫ് ഇന്‍ഷുറന്‍സ് കൊച്ചി സ്പൈസ് കോസ്റ്റ് മാരത്തണ്‍ 2023ന്റെ താരങ്ങളായി ജോസ് ഇല്ലിക്കലും തൃപ്തി കട്കര്‍ ചവാനും. ഫുള്‍മാരത്തണ്‍ പുരുഷ വിഭാഗത്തില്‍ വയനാട് സ്വദേശിയായ ജോസ് ഇല്ലിക്കല്‍ ഒന്നാമതെത്തിയപ്പോള്‍, വനിതാ വിഭാഗത്തില്‍ മഹാരാഷ്‌ട്രയുടെ തൃപ്തി ചവാന്‍ ചാമ്പ്യനായി.
മികച്ച രീതിയില്‍ മത്സരം തുടങ്ങിയ നിലവിലെ ചാമ്പ്യനായ ജോസ് മത്സരത്തിന്റെ തുടക്കത്തില്‍ തന്നെ ലീഡ് നേടി. 3 മണിക്കൂര്‍, 2 മിനിറ്റ് 55 സെക്കന്‍ഡിലാണ് 42.2 കി.മീറ്റര്‍ ദൂരം ഫിനിഷ് ചെയ്തത്. ബെന്‍സണ്‍ സി.ബി (03:05:34), സുജിത്ത് ടി.ആര്‍ (03:14:33) എന്നിവര്‍ ഈ വിഭാഗത്തില്‍ യഥാക്രമം രണ്ടും മൂന്നും സ്ഥാനങ്ങള്‍ നേടി. കഴിഞ്ഞ മാരത്തണിലെയും ജേതാവായിരുന്നു ജോസ്. ബെന്‍സണ്‍ തന്നെയായിരുന്നു രണ്ടാമത്. വനിതകളുടെ ഫുള്‍ മാരത്തണില്‍ ഏകപക്ഷീയ വിജയമായിരുന്നു തൃപ്തി ചവാന്റേത്. തുടക്കം മുതല്‍ വെല്ലുവിളിയില്ലാതെ മുന്നേറിയ അവര്‍ 04:31:55 സമയത്തില്‍ ഒന്നാമതായി ഫിനിഷ് ചെയ്തു. ഷൈമ ഐ.കെ (05:02:09) രണ്ടാം സ്ഥാനവും, ഷൈനാമോള്‍ പാലത്താന (05:09:33) മൂന്നാം സ്ഥാനവും നേടി.
ഹാഫ് മാരത്തണില്‍ സജിത്ത് കെ.എം (01:21:49), രമ എ.കെ (02:01:25) എന്നിവര്‍ യഥാക്രമം പുരുഷ, വനിത വിഭാഗങ്ങളില്‍ ചാമ്പ്യന്‍മാരായി. ഡേവിഡ് കൗലിഷോ (01:25:26) അതുല്‍ രാജ് (01:27:40) എന്നിവരാണ് പുരുഷ വിഭാഗത്തിലെ രണ്ടും മൂന്നും സ്ഥാനക്കാര്‍. ശ്രീദേവി കെ.സി (02:07:41) വനിത വിഭാഗത്തില്‍ രണ്ടാം സ്ഥാനം നേടി. സോജ സിയ (02:11:18) മൂന്നാം സ്ഥാനത്ത് ഫിനിഷ് ചെയ്തു. മഹാരാജാസ് കോളജ് ഗ്രൗണ്ടില്‍ നിന്ന് തുടങ്ങി ഹോസ്പിറ്റല്‍ റോഡ്, ബോട്ട് ജെട്ടി, മറൈന്‍ ഡ്രൈവ് ക്വീന്‍സ് വേ, ഫോര്‍ഷോര്‍ റോഡ്, തേവര, രവിപുരം, നേവല്‍ ബേസ്, വെണ്ടുരുത്തി, തോപ്പുംപടി, ഫോര്‍ട്ട്കൊച്ചി, മട്ടാഞ്ചേരി, എം.ജി റോഡ് വഴി കറങ്ങി തിരികെ മഹാരാജാസ് കോളജ് ഗ്രൗണ്ടില്‍ അവസാനിക്കുന്ന വിധത്തിലായിരുന്നു മാരത്തണ്‍.
പുലര്‍ച്ചെ 3.30ന് മഹാരാജാസ് കോളജ് ഗ്രൗണ്ടില്‍ ഏജസ് ഫെഡറല്‍ ലൈഫ് ഇന്‍ഷുറന്‍സിന്റെ ബ്രാന്‍ഡ് അംബാസഡറും ക്രിക്കറ്റ് ഇതിഹാസവുമായ സച്ചിന്‍ ടെണ്ടുല്‍ക്കര്‍ ഫുള്‍ മാരത്തണ്‍ ഫഌഗ്ഓഫ് ചെയ്തു. ഹാഫ് മാരത്തണ്‍, ഫണ്‍ റണ്‍ എന്നിവയുടെ ഫഌഗ്ഓഫും സച്ചിന്‍ നിര്‍വഹിച്ചു.
പ്രതികരിക്കാൻ ഇവിടെ എഴുതുക: