പോത്തന്‍കോട് (തിരുവനന്തപുരം): ശാന്തിഗിരി ആശ്രമത്തിലെ 39-ാമത് സന്ന്യാസദീക്ഷ വാര്‍ഷികത്തോടനുബന്ധിച്ച് ഗുരുസ്ഥാനീയ ശിഷ്യപൂ
ജിത അമൃതജ്ഞാന തപസ്വിനിയില്‍ നിന്നും 22 ബ്രഹ്മചാരിണികള്‍ ദീക്ഷ സ്വീകരിച്ചു.
രാവിലെ 5 മണിയുടെ ആരാധനയോടെയാണ് ചടങ്ങുകള്‍ക്ക് തുടക്കമായത്. പ്രാര്‍ത്ഥനാമുഖരിതമായ അന്തരീക്ഷത്തില്‍ സഹകരണ മന്ദിരത്തില്‍ രാവിലെ 9 ന് ദീക്ഷ ചടങ്ങുകള്‍ ആരംഭിച്ചു. ബ്രഹ്മചാരിണിമാരില്‍ ഓരോരുത്തരായി ശിഷ്യപൂജിതയ്‌ക്ക് മുന്നില്‍ താമരപ്പൂക്കളും തെളിയിച്ച വെള്ളിവിളക്കും നവധാന്യങ്ങളുമടങ്ങിയ തട്ടം സമര്‍പ്പിച്ച് ഗുരുപാദ വന്ദനം നടത്തി. പ്രത്യേകം സജ്ജീകരിച്ച പീഠത്തില്‍ ഗുരുസങ്കല്‍പ്പത്തോടെ ഹാരം ചാര്‍ത്തി ആരാധന നടത്തി ഓരോരുത്തരും ശിഷ്യപൂജിതയില്‍ നിന്നും വസ്ത്രവും പുതിയനാമവും സ്വീകരിച്ചു.
ശുഭ്രവസ്ത്രധാരികളായ ബ്രഹ്മചാരിണിമാര്‍ ദീക്ഷ സ്വീകരിച്ച ശേഷം പീതവസ്ത്രധാരികളായി മാറി. ഗുരുകല്പനപ്രകാരം പുതിയ അംഗങ്ങളുടെ ദീക്ഷാനാമം ജനറല്‍ സെക്രട്ടറി സ്വാമി ഗുരുരത്‌നം ജ്ഞാനതപസ്വി വിളംബരം ചെയ്തു. പേരിനോടൊപ്പം ‘ജ്ഞാന തപസ്വിനി’ എന്നും ചേര്‍ക്കപ്പെടും. ദീക്ഷ സ്വീകരിച്ചവരില്‍ നാലു പേര്‍ കേരളത്തിന് പുറത്തുനിന്നുള്ളവരാണ്.
പുതുതായി 22 പേര്‍ കൂടി ചേര്‍ന്നതോടേ 104 പേരടങ്ങുന്ന ആശ്രമത്തിന്റെ സന്ന്യാസസംഘം 126 അംഗങ്ങളായി. ഉച്ചയ്‌ക്ക് 12 മണിയുടെ ആരാധനയ്‌ക്ക് ശേഷം താമര പര്‍ണശാലയില്‍ സന്ന്യാസസംഘത്തിന്റെയും രക്ഷാകര്‍തൃസമിതിയുടേയും വിവിധ സമര്‍പ്പണങ്ങള്‍ നടന്നു.
ഉച്ചയ്‌ക്ക് ഒരു മണിക്ക് നടന്ന അനുമോദനസമ്മേളനത്തില്‍ ആശ്രമത്തിന്റെ ആദ്യകാല വനിതാ പ്രവര്‍ത്തകരെ ആദരിച്ചു. ലോകത്തിന്റെ വിവിധഭാഗങ്ങളില്‍ നിന്നായി ആയിരക്കണക്കിന് ഗുരുഭക്തരും ആത്മീയ സാമൂഹിക രാഷ്‌ട്രീയ സാംസ്‌കാരിക മേഖലകളിലെ പ്രമുഖരും ചടങ്ങുകളില്‍ സംബന്ധിച്ചു.
വൈകുന്നേരം 6 ന് ആരാധനയ്‌ക്ക് ശേഷം പുഷ്പസമര്‍പ്പണവും തുടര്‍ന്ന് ദീപപ്രദക്ഷിണവും നടന്നു. ഇതോടെ കഴിഞ്ഞ പത്തുദിവസമായി നടന്നുവന്ന പ്രത്യേക പ്രാര്‍ത്ഥനാചടങ്ങുകള്‍ക്ക് സമാപനമായി.
പ്രതികരിക്കാൻ ഇവിടെ എഴുതുക: