ദുബായ്: ജിസിസി രാജ്യങ്ങൾക്കിടയിൽ സഞ്ചരിക്കാനുതകുന്ന ഏകീകൃത ടൂറിസ്റ്റ് വിസ അടുത്ത 2 വർഷത്തിനിടയിൽ യഥാർത്ഥ്യമാക്കുമെന്ന് യുഎഇ സാമ്പത്തിക വകുപ്പ് മന്ത്രി അബ്ദുല്ല ബിൻ തൗഖ് അൽ മാരി അറിയിച്ചു. ഗൾഫ് കോഓപ്പറേഷൻ കൗൺസിൽ അംഗങ്ങളായ ആറ് രാജ്യങ്ങൾക്കിടയിൽ യാത്രകൾ അനുവദിക്കുന്നതിനുള്ള ഇത്തരം വിസ 2024- 2025 വർഷങ്ങൾക്കിടയിൽ നടപ്പിലാക്കുമെന്ന് അദ്ദേഹം വ്യക്തമാക്കി.
വരാനിരിക്കുന്ന ജിസിസി ഉച്ചകോടിയിൽ ഇത് അവതരിപ്പിക്കാൻ ഒമാനിൽ വെച്ച് നടന്ന ജിസിസി ടൂറിസം മന്ത്രിമാരുടെ യോഗത്തിൽ ഏകകണ്ഠമായി തീരുമാനിച്ചതായും അദ്ദേഹം കൂട്ടിച്ചേർത്തു. ഇത്തരം ഒരു ഏകീകൃത ടൂറിസ്റ്റ് വിസ സന്ദർശകർക്ക് ഒരേ വിസ ഉപയോഗിച്ച് കൊണ്ട് ആറ് രാജ്യങ്ങളിലേക്ക് പ്രവേശനം നൽകുമെന്നും, ഇത് കൂടുതൽ സന്ദർശകരെ മേഖലയിലേക്ക് ആകർഷിക്കുമെന്നും അദ്ദേഹം അറിയിച്ചു.
ഓരോ ജിസിസി രാജ്യത്തിന്റെയും ആഭ്യന്തര സംവിധാനങ്ങൾക്ക് വിധേയമായി ഈ വിസയുമായി ബന്ധപ്പെട്ട പ്രത്യേക നിയന്ത്രണങ്ങളും നിയമനിർമ്മാണങ്ങളും 2024 നും 2025 നും ഇടയിൽ വികസിപ്പിക്കുമെന്നും അദ്ദേഹം പറഞ്ഞു. കൂടാതെ ഗൾഫ് മേഖലയിലുടനീളം സാമ്പത്തിക സമന്വയം വളർത്തിയെടുക്കുന്നതിന് ഈ വിസ കാരണമാകും. ഇതിനു പുറമെ ഏകീകൃത വിസ നിലവിൽ വരുന്നതോടെ യുഎഇയിൽ അന്താരാഷ്ട്ര വിനോദസഞ്ചാരികളുടെ എണ്ണത്തിൽ വർദ്ധനവ് ഉണ്ടാകുമെന്നും അദ്ദേഹം വ്യക്തമാക്കി.
വിസയുടെ ഭാഗമായി എമിറേറ്റ്സ് ടൂറിസം കൗൺസിൽ യുഎഇയുടെ ഏഴ് എമിറേറ്റുകളെ പരസ്പരം ബന്ധിപ്പിക്കുന്ന ഒരു ടൂറിസ്റ്റ് റൂട്ട് രൂപപ്പെടുത്തിയിട്ടുണ്ടെന്നും അദ്ദേഹം അറിയിച്ചു. ജിസിസി 2030 ടൂറിസം തന്ത്രത്തിന്റെ അവിഭാജ്യ ഘടകമാണ് ഈ സംരംഭം. അന്തർ-ജിസിസി യാത്രയിലൂടെയും ഉയർന്ന ഹോട്ടൽ താമസ നിരക്കിലൂടെയും ജിഡിപിയിലേക്ക് ടൂറിസം മേഖലയുടെ സംഭാവന ഉയർത്താൻ ഇത് കാരണമാകുമെന്നും അദ്ദേഹം കൂട്ടിച്ചേർത്തു.
യുഎഇയുടെ ജിഡിപിയിൽ വിനോദസഞ്ചാര മേഖലയുടെ നിലവിലെ സംഭാവന 14 ശതമാനമാണ്. രാജ്യത്തിന്റെ തന്ത്രപ്രധാനമായ ടൂറിസം ലക്ഷ്യങ്ങൾ നിറവേറ്റുന്നതിനായി ഈ കണക്ക് 18 ശതമാനമായി ഉയർത്താനാണ് ലക്ഷ്യമിടുന്നത്.
ജന്മഭൂമി ഓണ്ലൈന്