ലണ്ടന്‍: ഇംഗ്ലണ്ടിന്റെ ഫുട്ബോള്‍ ഇതിഹാസം സര്‍ ബോബി ചാള്‍ട്ടണ്‍ (86) അന്തരിച്ചു. 1966ല്‍ ഇംഗ്ലണ്ടിനായി ഫുട്ബോള്‍ ലോകകപ്പ് കിരീടം നേടിയ താരമാണ് ചാള്‍ട്ടണ്‍. ഇംഗ്ലണ്ടിന്റെ ലോകകപ്പ് കിരീടനേട്ടത്തില്‍ നിര്‍ണായക പങ്കുവഹിച്ച ചാള്‍ട്ടണ്‍ ഇംഗ്ലീഷ് പ്രീമിയര്‍ ലീഗ് ക്ലബ്ബായ മാഞ്ചസ്റ്റര്‍ യുണൈറ്റഡിന്റെ സൂപ്പര്‍ താരവുമായിരുന്നു.
ഇംഗ്ലണ്ടിനായി 106 മത്സരങ്ങള്‍ കളിച്ച ചാള്‍ട്ടണ്‍ രാജ്യത്തിനായി ഏറ്റവുമധികം ഗോളുകള്‍ നേടിയ കളിക്കാരനുമായിരുന്നു. 49 ഗോളുകളാണ് ചാള്‍ട്ടന്റെ അക്കൗണ്ടിലുണ്ടായിരുന്നത്. 2015ല്‍ വെയ്ന്‍ റൂണിയാണ് ഈ റിക്കാര്‍ഡ് മറികടന്നത്. മാഞ്ചസ്റ്റര്‍ യുണൈറ്റഡിനുവേണ്ടി 758 മത്സരങ്ങളിനല്‍ നിന്ന് 249 ഗോളുകളടിച്ചു. യുണൈറ്റഡിനായി ഏറ്റവും കൂടുതല്‍ മത്സരം കളിച്ച രണ്ടാമത്തെ താരമാണ് ചാള്‍ട്ടണ്‍.
1966 ലോകകപ്പില്‍ ചാള്‍ട്ടന്റെ തകര്‍പ്പന്‍ പ്രകടനമാണ് ഇംഗ്ലണ്ടിനെ കിരീടത്തിലേക്ക് നയിച്ചത്. ചാള്‍ട്ടണ്‍ ടീമിന്റെ ടോപ് സ്‌കോററുമായി. 1958ല്‍ ഇംഗ്ലണ്ടിനായി അരങ്ങേറ്റം കുറിച്ച താരം 1970 വരെ ദേശീയ ടീമില്‍ കളിച്ചു. 1956 മുതല്‍ 1973 മുതല്‍ മാഞ്ചസ്റ്റര്‍ യുണൈറ്റഡിനായി കളിച്ചു. എഫ്എ കപ്പ്, യൂറോപ്യന്‍ കപ്പ് തുടങ്ങിയ കിരീടങ്ങള്‍ ചാള്‍ട്ടണ്‍ സ്വന്തമാക്കി.
ഫുട്ബോളില്‍ നിന്ന് വിരമിച്ചശേഷം ചാള്‍ട്ടണ്‍ മാഞ്ചെസ്റ്റര്‍ യുണൈറ്റഡിന്റെ ഡയറക്ടറായി. ബോബി ചാള്‍ട്ടണ്‍ ഫൗണ്ടേഷന്‍ എന്ന പേരില്‍ നിരവധി പ്രവര്‍ത്തനങ്ങള്‍ മാഞ്ചസ്റ്റര്‍ ഇപ്പോഴും തുടരുന്നു.
പ്രതികരിക്കാൻ ഇവിടെ എഴുതുക: