ഹൈദരാബാദ്: കോണ്‍ഗ്രസ് രാജ്യത്തിന്റെ സി ടീമാണെന്ന് രാഹുലിന് ബിആര്‍എസിന്റെ മറുപടി. സി ടീമെന്നാല്‍ ചോര്‍ ടീം. കള്ളന്മാരുടെ സംഘം, ബിആര്‍എസ് വര്‍ക്കിങ് പ്രസിഡന്റും തെലങ്കാന മന്ത്രിയുമായ കെ.ടി. രാമറാവുവാണ് തെലങ്കാന ഭവനില്‍ ചേര്‍ന്ന വാര്‍ത്താസമ്മേളനത്തില്‍ കോണ്‍ഗ്രസിനെതിരെ ആഞ്ഞടിച്ചത്.
ബിജെപിയുടെ ബി ടീമാണ് ബിആര്‍എസ് എന്ന രാഹുലിന്റെ പ്രസ്താവനയ്‌ക്ക് മറുപടിയായാണ് രാമറാവു തിരിച്ചടിച്ചത്. എ മുതല്‍ സെഡ് വരെയുള്ള എല്ലാ കുംഭകോണങ്ങളും നടത്തിയ പാര്‍ട്ടിയാണ് കോണ്‍ഗ്രസ്. എ ഫോര്‍ ആദര്‍ശ് സ്‌കാം, ബി ഫോര്‍ ബൊഫോഴ്‌സ് സ്‌കാം, സി ഫോര്‍ കോമണ്‍വെല്‍ത്ത് സ്‌കാം… പറഞ്ഞുതുടങ്ങിയാല്‍ കണക്ക് കൂട്ടാന്‍ അക്ഷരങ്ങള്‍ വേറെ തെരയേണ്ടിവരും.
ആകാശം മുതല്‍ പാതാളം വരെ കൊള്ളയടിച്ചവരാണ് നിങ്ങള്‍. ആകാശത്ത് അഗസ്റ്റ ഹെലികോപ്റ്റര്‍ കുംഭകോണം. ഭൂമിക്കടിയില്‍ കല്‍ക്കരി കുംഭകോണം. നിങ്ങളുടെ കേന്ദ്രമന്ത്രിമാര്‍ ജയിലില്‍ പോയതെന്തിനാണെന്ന് വ്യക്തമാക്കണം. നിങ്ങളും അമ്മ സോണിയയും നാഷണല്‍ ഹെറാള്‍ഡ് കേസില്‍ ജാമ്യത്തിലാണെന്ന് മറക്കരുത്, കെ.ടി. രാമറാവു പറഞ്ഞു.
പ്രതികരിക്കാൻ ഇവിടെ എഴുതുക: