ന്യൂദല്‍ഹി : വധശിക്ഷയ്‌ക്ക് വിധിക്കപ്പെട്ട് യമന്‍ ജയിലില്‍ കഴിയുന്ന മലയാളി നഴ്സ് നിമിഷപ്രിയയുടെ മോചനത്തിനായി യെമനിലേക്ക് തിരിക്കാന്‍ കേന്ദ്രസര്‍ക്കാര്‍ സഹായം തേടിയുള്ള നിമിഷയുടെ അമ്മയുടെ ഹർജിയിൽ നിലപാട് അറിയിക്കാൻ കേന്ദ്രസർക്കാരിനോട് നിർദേശിച്ച് ദൽഹി ഹൈക്കോടതി. രണ്ടാഴ്ചയ്ക്കകം കേസിന്റെ തല്‍സ്ഥിതി റിപ്പോര്‍ട്ട് സമര്‍പ്പിക്കാനാണ് നിർദേശം.
നവംബര്‍ 16 ന് നിമിഷയുടെ അമ്മ പ്രേമകുമാരിയുടെ ഹര്‍ജി ദല്‍ഹി ഹൈക്കോടതി വീണ്ടും പരിഗണിക്കും. യെമന്‍ പൗരനെ കൊലപ്പെടുത്തിയ കേസില്‍ അവിടുത്തെ ജയിലില്‍ കഴിയുന്ന നിമിഷപ്രിയയുടെ മോചനം സാധ്യമാകാത്ത സഹചര്യത്തിലാണ് മാതാവ് പ്രേമകുമാരി ദൽഹി ഹൈക്കോടതിയെ സമീപിച്ചത്. സേവ് നിമിഷ ഭാരവാഹികള്‍ക്കൊപ്പം യെമനിലേക്ക് യാത്ര ചെയ്യുന്നതിന് നയതന്ത സൗകര്യങ്ങള്‍ ഒരുക്കാന്‍ കേന്ദ്രസര്‍ക്കാരിനോട് നിര്‍ദേശിക്കണമെന്നായിരുന്നു പ്രേമകുമാരിയുടെ പ്രധാന ആവശ്യം.
എന്നാല്‍ യാത്രയ്‌ക്കുള്ള വിസ അനുവദിക്കേണ്ടത് യെമന്‍ സര്‍ക്കാരാണെന്നും അതിനാല്‍ തങ്ങള്‍ക്ക് ഇക്കാര്യത്തില്‍ ഒന്നും ചെയ്യാനില്ലെന്നും കേന്ദ്ര സര്‍ക്കാരിന് വേണ്ടി ഹാജരായ അഭിഭാഷകന്‍ പവന്‍ നാരങ് ചൂണ്ടിക്കാട്ടി. യെമന്‍ സന്ദര്‍ശനത്തിന് അനുമതി തേടി ഒരു നിവേദനം നല്‍കിയത് ഒഴിച്ച് പ്രേമകുമാരി മറ്റൊരു നടപടിയും സ്വീകരിച്ചില്ലെന്നും കേന്ദ്രം ഹൈക്കോടതിയെ അറിയിച്ചു.
2016 മുതല്‍ യെമെനിലക്ക് ഇന്ത്യന്‍ പൗരന്മാര്‍ക്ക് കേന്ദ്രം യാത്രാ വിലക്ക് ഏര്‍പെടുത്തിരിയിരിക്കുകയാണ്. അതിനാല്‍ വിസയ്‌ക്കുള്ള അപേക്ഷ നല്‍കാന്‍ പോലും കഴിയുന്നില്ലെന്നുമാണ് നിമിഷപ്രിയയുടെ അമ്മയ്‌ക്കുവേണ്ടി ഹാജരായ അഭിഭാഷകന്‍ കെ ആര്‍ സുഭാഷ് ചന്ദ്രന്‍ വാദിച്ചത്.
പ്രതികരിക്കാൻ ഇവിടെ എഴുതുക: