പത്തനംതിട്ട: പ്രായപൂര്‍ത്തിയാകാത്ത പെണ്‍കുട്ടിയെ ലൈംഗിക പീഡനത്തിന് ഇരയാക്കിയ കേസില്‍ രണ്ടാനച്ഛന് 60 വര്‍ഷം കഠിന തടവ് വിധിച്ച് കോടതി. 14 വയസ് പ്രായമുള്ള പെണ്‍കുട്ടിയെ നിരവധി തവണ ലൈംഗിക പീഡനത്തിനിരയാക്കിയ കേസില്‍ ഐരൂര്‍ സ്വദേശിയായ 45 കാരനെയാണ് പത്തനംതിട്ട പ്രിന്‍സിപ്പല്‍ പോക്‌സോ കോടതി തടവിന് വിധിച്ചത്. 2 ലക്ഷം രൂപ പിഴ ഒടുക്കണം. പിഴ അടയ്‌ക്കാന്‍ കഴിഞ്ഞില്ലെങ്കില്‍ രണ്ട് വര്‍ഷം അധിക കഠിന തടവ് അനുഭവിക്കണം.
പെണ്‍കുട്ടിയുടെ മാതാപിതാക്കള്‍ വിവാഹ ബന്ധം വേര്‍പിരിഞ്ഞിരുന്നു. പിന്നാലെ പെണ്‍കുട്ടിയെ സംരക്ഷിക്കുന്നതിനായി പ്രതിയെ വിവാഹം കഴിക്കുകയായിരുന്നു. രണ്ടാം വിവാഹത്തില്‍ മകന്‍ ജനിക്കുകയും ചെയ്തിരുന്നു. 2014 മുതല്‍ 2018 വരെയുള്ള കാലയളവില്‍ ഭീഷണിപ്പെടുത്തിയും ബലപ്രയോഗത്തിലൂടെയും പീഡനത്തിന് ഇരയാക്കുകയായിരുന്നു എന്നാണ് കേസ്.
പെണ്‍കുട്ടിയുടെ മാതാവിന് വിദേശത്തായിരുന്നു ജോലി. പെണ്‍കുട്ടി തുടര്‍ പഠനവുമായി ബന്ധപ്പെട്ട് ഹോസ്റ്റലില്‍ താമസിച്ചു വരവേ പഠന വൈകല്യം ശ്രദ്ധയില്‍ പെട്ടതിനെ തുടര്‍ന്ന് നല്‍കിയ കൗണ്‍സിലിങ്ങിനിടയിലാണ് പീഡന വിവരം പുറത്തറിയുന്നത്. തുടര്‍ന്ന് വിവരം അറിഞ്ഞ മാതാവ് വിദേശത്തുള്ള ജോലി ഉപേക്ഷിച്ച് നാട്ടിലെത്തി. മകളെ കണ്ട് വിവരങ്ങളറിഞ്ഞതിന് പിന്നാലെ രണ്ടാനച്ഛനെതിരെ പൊലീസില്‍ മാതാവ് പരാതി നല്‍കുകയായിരുന്നു.
പ്രതികരിക്കാൻ ഇവിടെ എഴുതുക: