ന്യൂദല്ഹി: കോടതി മുറിക്കുള്ളില് ഫോണില് സംസാരിച്ച അഭിഭാഷകനെതിരെ നടപടിയെടുത്ത് സുപ്രീംകോടതി ചീഫ് ജസ്റ്റിസ് ഡി.വൈ.ചന്ദ്രചൂഡ്. അഭിഭാഷകന്റെ മൊബൈല് ഫോണ് സുപ്രീം കോടതി കണ്ടുകെട്ടി. ഇത് ചന്തയാണോയെന്നും കോടതി വിമര്ശിച്ചു.
കോടതി നടപടികള് പുരോഗമിക്കുന്നതിനിടെ അഭിഭാഷകന് മൊബൈല് ഫോണില് സംസാരിച്ചത് അലോസരപ്പെടുത്തുന്ന സാഹചര്യം ഉണ്ടായതാണ് ചീഫ് ജസ്റ്റിസ് ഡി വൈ ചന്ദ്രചൂഡ് ഇടപെടാന് കാരണം. ഇത്തരം പ്രവൃത്തികള് ആവര്ത്തിച്ചാല് നടപടിയെടുക്കുമെന്ന മുന്നറിയിപ്പും നല്കി. ഭാവിയില് കൂടുതല് ജാഗ്രത കാണിക്കണം. കോടതി മുറികളില് മര്യാദയോടെ പെരുമാറേണ്ടതിനെക്കുറിച്ചും കോടതി ഓര്മിപ്പിച്ചു. ജഡ്ജിമാര് എല്ലാം കാണുന്നുണ്ട്. കടലാസില് നോക്കിയിരുന്നാലും അവരുടെ കണ്ണ് എല്ലായിടത്തും എത്തുമെന്നും അദ്ദേഹം പറഞ്ഞു.
ചീഫ് ജസ്റ്റിസിനെ കൂടാതെ ജസ്റ്റിസ് ജെ.ബി. പര്ദിവാല, ജസ്റ്റിസ് മനോജ് മിശ്ര എന്നിവരടങ്ങിയ ബെഞ്ചാണ് കോടതിമുറിയിലുണ്ടായിരുന്നത്. ഇതിനിടെ ഒരു അഭിഭാഷകന് ഫോണില് സംസാരിക്കുകയായിരുന്നു. ഇതോടെ നടപടിക്രമങ്ങള് നിര്ത്തിയ ചീഫ് ജസ്റ്റിസ് അഭിഭാഷകനെ നേരിട്ട് വിളിച്ചു. ‘ഫോണില് സംസാരിക്കാന് ഇതെന്താ ചന്തയോ’ എന്ന് ചോദിച്ച ചീഫ് ജസ്റ്റിസ്, അഭിഭാഷകന്റെ ഫോണ് വാങ്ങിവെക്കാന് കോര്ട് മാസ്റ്റര്ക്ക് നിര്ദേശം നല്കി. ‘കോടതിമുറിയില് അച്ചടക്കം കൃത്യമായി പാലിക്കേണ്ടതുണ്ട്. ജഡ്ജിമാര് എല്ലാം കാണുന്നുണ്ട്. ഞങ്ങള് ചിലപ്പോള് രേഖകള് പരിശോധിക്കുകയാവാം, എന്നാല് ഞങ്ങളുടെ കണ്ണുകള് എല്ലായിടത്തുമുണ്ട്’ ചീഫ് ജസ്റ്റിസ് പറഞ്ഞു.
