അസര്‍ബൈജാന്‍: പ്രശസ്ത കലാസംവിധായകന്‍ മിലന്‍ ഫെര്‍ണാണ്ടസ് (54) ഹൃദയാഘാതത്തെ തുടര്‍ന്ന് അസര്‍ബൈജാനില്‍ അന്തരിച്ചു. അജിത്തിനെ നായകനാക്കി മകിഴ് തിരുമേനി സംവിധാനം ചെയ്യുന്ന വിടാമുയര്‍ച്ചി എന്ന സിനിമയുടെ ചിത്രീകരണത്തിനായി അസര്‍ബൈജാനില്‍ എത്തിയതായിരുന്നു അദ്ദേഹം. രാവിലെ
അസ്വാസ്ഥ്യമുണ്ടായതിനേത്തുടര്‍ന്ന് മിലനെ ആശുപത്രിയില്‍ പ്രവേശിപ്പിക്കുകയായിരുന്നു.
ഞായറാഴ്ച രാവിലെ സിനിമയുടെ ചിത്രീകരണം തുടങ്ങുന്നതിന് മുന്നോടിയായി ടീം അംഗങ്ങളെ വിളിച്ചുചേര്‍ത്തിരുന്നു. ഇതിനിടയിലാണ് മിലന്‍ ദേഹാസ്വാസ്ഥ്യം പ്രകടിപ്പിച്ചത്. അജിത്ത് ചിത്രങ്ങളിലെ സ്ഥിരം സാന്നിധ്യമായിരുന്നു മിലന്‍. മലയാളത്തില്‍ പദ്മശ്രീ ഭരത് ഡോ. സരോജ് കുമാര്‍ എന്ന സിനിമയിലും പ്രവര്‍ത്തിച്ചിട്ടുണ്ട്. 1999-ല്‍ കലാ സംവിധായകന്‍ സാബു സിറിളിന്റെ സഹായിയായാണ് സിനിമാ പ്രവേശനം. 2006-ല്‍ കലാപ കാതലന്‍ എന്ന ചിത്രത്തിലൂടെ സ്വതന്ത്ര കലാസംവിധായകനായി. ബില്ല, ഏകന്‍, വേട്ടൈക്കാരന്‍, വേലായുധം, വീരം, വേതാളം, ബോഗന്‍, വിവേഗം, സാമി 2 തുടങ്ങി നിരവധി ചിത്രങ്ങള്‍ക്കായി പ്രവര്‍ത്തിച്ചു.
സൂര്യ നായകനായ കങ്കുവാ ആണ് വിടാമുയര്‍ച്ചിക്ക് മുമ്പേ മിലന്‍ ചെയ്ത ചിത്രം. ഭാര്യക്കും മകനുമൊപ്പമായിരുന്നു താമസം.
പ്രതികരിക്കാൻ ഇവിടെ എഴുതുക: