പറവൂര്‍: ഭാര്യയോട് അപമര്യാദയായി പെരുമാറിയത് ചോദ്യം ചെയ്ത ദലിത് യുവാവിനെ ഡി.വൈ.എഫ്.ഐ മുന്‍ ബ്ലോക്ക് പ്രസിഡന്റിന്റെ നേതൃത്വത്തിലുള്ള സംഘം തല്ലിച്ചതച്ചതായി പരാതി. ചേരാനെല്ലൂര്‍ എടയകുന്നം സ്വദേശിയായ 35കാരനാണ് മര്‍ദ്ദനമേറ്റ് ആശുപത്രിയില്‍ ചികിത്സയിലുള്ളത്.
സിനിമകണാന്‍ തിയേറ്ററിലെത്തിയ ദമ്പതികള്‍ക്കാണ് ഈ ദുരവസ്ഥയുണ്ടായത്. സംഭവത്തില്‍ ചേന്ദമംഗലം കിഴക്കുംപുറം തുപ്പേലില്‍ ദീപുവിനെ (41) അറസ്റ്റ് ചെയ്തു. കണ്ടാലറിയാവുന്ന 20പേര്‍ക്കെതിരെയും കേസെടുത്തു.
ഷഫാസ് തിയേറ്ററില്‍ ഞായറാഴ്ച രാത്രി സെക്കന്‍ഡ്‌ഷോ കഴിഞ്ഞ ഉടനെയാണ് ആക്രമണം. ഇടവേളയില്‍ ലഘുഭക്ഷണം കഴിക്കാന്‍ കൗണ്ടറിന് സമീപം എത്തിയ ഭാര്യയെ ദീപു കയറിപ്പിടിച്ചു. ഇത് യുവാവ് ചോദ്യം ചെയ്തിരുന്നു. ഇതിന് പ്രതികാരമെന്നോണം പഞ്ചായത്ത് വൈസ് പ്രസിഡന്റും ഡിവൈഎഫ്ഐ നേതാവായ സഹോദരന്റെയും നേതൃത്വത്തില്‍ മുപ്പതോളം വരുന്ന സിപിഎം-ഡിവൈഎഫ്ഐ പ്രവര്‍ത്തകര്‍ കൂട്ടമായെത്തുകയും സിനിമകഴിഞ്ഞിറങ്ങിയ ദമ്പതികളെ മര്‍ദ്ദിക്കുകയായിരുന്നു. യുവതിയുടെ മുടിക്ക് പിടിച്ച് വലിച്ചിഴച്ചതായും തള്ളിയിട്ടതായും പരാതിയുണ്ട്.
സ്ഥലത്ത് പോലീസ് എത്തി ആക്രമികളില്‍ ചിലരെ പിടികൂടിയെങ്കിലും പഞ്ചായത്ത് വൈസ് പ്രസിഡന്റിന്റെ നേതൃത്വത്തില്‍ ബലമായി പിടിച്ചിറക്കി കൊണ്ടുപോവുകയായിരുന്നു. സംഭവത്തില്‍ കൂടുതല്‍ പ്രതികള്‍ ഉണ്ടെങ്കിലും പാര്‍ട്ടി ഇടപെടലിനെത്തുടര്‍ന്ന് ഒത്തുതീര്‍പ്പാക്കി ദീപുവിനെ മാത്രം ഹാജരാക്കി. സംഭവത്തില്‍ പോലീസ് രണ്ട് കേസ് രജിസ്റ്റര്‍ ചെയ്തിട്ടുണ്ട്. കോടതിയില്‍ ഹാജരാക്കിയ ദീപുവിനെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: