കണ്ണൂര്‍: മുഖ്യമന്ത്രിയുടെ ചിത്രമുള്ള ലൈഫ് മിഷന്‍ പരസ്യബോര്‍ഡ് മറഞ്ഞതിന് സ്‌കൂള്‍ അങ്കണത്തിലെ മരക്കൊമ്പുകള്‍ അനുവാദമില്ലാതെ അജ്ഞാതർ മുറിച്ചുമാറ്റി. മൂന്നുപേരടങ്ങുന്ന സംഘമാണ് കണ്ണൂര്‍ താവക്കര സര്‍ക്കാര്‍ യു.പി. സ്‌കൂള്‍ അങ്കണത്തിലെ മരം മുറിച്ചുമാറ്റിയത്. പ്രധാനധ്യാപകന്‍ പോലീസിലും കണ്ണൂര്‍ കോര്‍പ്പറേഷനിലും പരാതി നല്‍കി.
ഇന്നലെ അവധിയായതിനാൽ സ്കൂളിൽ ആരുമുണ്ടായിരുന്നില്ല. കോമ്പൗണ്ടിൽ അതിക്രമിച്ച് കയറിയ മൂന്ന് പേരാണ് പിന്നിലെന്നാണ് പ്രധാനധ്യാപകന്റെ പരാതി. കണ്ണൂർ പൊലീസ് ക്ലബ് ജംഗ്ഷനിൽ നിന്ന് താവക്കര അടിപ്പാത ഭാഗത്തേക്ക് പോകുന്ന റോഡിലാണ് സർക്കാരിന്റെ പരസ്യ ബോർഡ്. വീടിന്റെ പാലുകാച്ചല്‍ ചടങ്ങില്‍ മുഖ്യമന്ത്രി പങ്കെടുക്കുന്നതാണ് ചിത്രം.
ഫ്‌ളെക്‌സ് ബോര്‍ഡിന്റെ കാഴ്ച മറയ്‌ക്കുന്നതിനാല്‍ സ്കൂളിലെ മരം മുറിച്ചുമാറ്റണമെന്ന് സ്കൂളിലെ ഓഫീസ് അസിസ്റ്റന്റിനോട് ചിലര്‍ ആവശ്യപ്പെട്ടിരുന്നു. ബോർഡ് പുതിയതല്ലേ, മരം നേരത്തെയുണ്ടല്ലോ. മുറിക്കാനാകില്ലെന്ന് ഹെഡ്മാസ്റ്റർ അറിയിക്കുകയും ചെയ്തു. പിന്നാലെ ശനിയാഴ്ച രാവിലെ മൂന്നുപേരെത്തി സ്‌കൂള്‍ അധികൃതരുടെ അനുവാദമില്ലാതെ മരച്ചില്ലകള്‍ മുറിച്ചുമാറ്റിയെന്നാണ് പരാതി. അവധിദിനമായതിനാല്‍ സ്‌കൂളില്‍ അധ്യാപകരും വിദ്യാര്‍ഥികളും ഉണ്ടായിരുന്നില്ല. ഫ്‌ളെക്‌സ് ബോര്‍ഡ് കാണാന്‍ വേണ്ടിയാണ് മരം മുറിക്കുന്നതെന്ന് വന്നവരും പറഞ്ഞു.
ഫ്‌ളെക്‌സ് കാണത്തക്ക രീതിയിലുള്ള കൊമ്പുകള്‍ മാത്രമാണ് മുറിച്ചതായി കാണുന്നത്. സംഭവം കോര്‍പ്പറേഷനില്‍ അറിയിക്കുകയും പോലീസ് സ്‌റ്റേഷനില്‍ പരാതി നല്‍കുകയും ചെയ്തിട്ടുണ്ട്. രണ്ടു മരങ്ങളുടെ ചില്ലകളാണ് മുറിച്ചുമാറ്റിയത്. ഫ്‌ളെക്‌സ് ബോര്‍ഡിലെ ചിത്രം കാണുന്നുണ്ടെന്ന് ഉറപ്പുവരുത്താനായി, മുറിച്ചശേഷം ഫോണില്‍ ചിത്രമെടുത്തശേഷമാണ്‌ മൂന്നംഗം സംഘം മടങ്ങിയത്. ആളുകള്‍ തണല്‍ തേടി എത്തുന്ന സ്ഥലം കൂടിയാണിതെന്ന് സ്‌കൂള്‍ അധികൃതര്‍ പറയുന്നു.
പ്രതികരിക്കാൻ ഇവിടെ എഴുതുക: