അമ്പെയ്‌ത്തില്‍ മൂന്ന് മെഡലുറപ്പിച്ചു

ഹാങ്ചൗ: ഏഷ്യന്‍ ഗെയിംസ് അമ്പെയ്‌ത്ത് വേദിയില്‍ നിന്ന് ഭാരതത്തിന് ഇന്നലെ സന്തോഷ വാര്‍ത്ത. ഒരു സ്വര്‍ണവും വെള്ളിയും ഉറപ്പിച്ചതിന് പിന്നാലെ മറ്റൊരു വെള്ളിയും ഉറപ്പിച്ചു. പുരുഷന്‍മാരുടെ കോമ്പൗണ്ട് ഇനത്തില്‍ ഫൈനലിലെത്തിയ അഭിഷേക് വര്‍മയും ഓജസ് പ്രവീണും വനിതകളുടെ കോമ്പൗണ്ട് ഇനത്തില്‍ ഫൈനലില്‍ കടന്ന ജ്യോതി സുരേഖ വെന്നവുമാണ് ഭരതത്തിനായി മെഡലുറപ്പിച്ചത്.

അഭിഷേകും ഓജസും ഫൈനലില്‍ പരസ്പരം ഏറ്റുമുട്ടുന്നതോടെ അമ്പെയ്‌ത്തില്‍ ഒരു സ്വര്‍ണവും വെള്ളിയും ഭാരതം സ്വന്തമാക്കുമെന്ന് ഉറപ്പിച്ചു. കൊറിയയുടെ ജഹൂന്‍ ജൂവിനെ 147-145 എന്ന സ്‌കോറിന് മറികടന്നാണ് അഭിഷേക് ഫൈനലുറപ്പിച്ചത്. കൊറിയയുടെ തന്നെ ജെവോണ്‍ യാങ്ങിനെ 150-146 എന്ന സ്‌കോറിന് കീഴടക്കിയാണ് ഓജസ് ഫൈനലിലെത്തിയത്. സെമിയില്‍ ഇന്ത്യന്‍ താരം തന്നെയായ അതിഥി സ്വാമിയെ പരാജയപ്പെടുത്തിയായിരുന്നു ജ്യോതിയുടെ ഫൈനല്‍ പ്രവേശനം. ഇതോടെ ഒരു സ്വര്‍ണത്തിനോ വെള്ളിക്കോ സാധ്യത തെളിഞ്ഞു. 149-146 എന്ന സ്‌കോറിനായിരുന്നു ജ്യോതിയുടെ ജയം. അതിഥി വെങ്കല മെഡലിനായി മത്സരിക്കുന്നുണ്ട്.