മലപ്പുറം: സി.പി.എം നേതാവ് കെ. അനില് കുമാര് മലപ്പുറത്തെ മുസ്ലിം പെണ്കുട്ടിളെ അപമാനിച്ച് നടത്തിയ പ്രസംഗം പിന്വലിച്ച് മാപ്പ് പറയണമെന്ന് കേരള മുസ്ലിം ജമാഅത്തും രംഗത്ത്. കേരള മുസ്ലിം ജമാഅത്ത് മലപ്പുറം ജില്ല കമ്മിറ്റിയാണ് ഇക്കാര്യം ആവശ്യപ്പെട്ടത്.
കഴിഞ്ഞ ദിവസം തിരുവനന്തപുരം നിശാഗന്ധി ഓഡിറ്റോറിയത്തില് മനുഷ്യത്വ വിരുദ്ധ തീവ്ര നവലിബറല് ഫാഷിസ്റ്റ് പ്രചാരകനായ രവിചന്ദ്രന്റെ നേതൃത്വത്തിലുള്ള എസ്സെന്സ് നടത്തിയ ലിറ്റ്മസ് പരിപാടിയില് മലപ്പുറം ജില്ലയിലെ മുസ്ലിം പെണ്കുട്ടികളുടെ മതപരമായ വേഷ വിധാനത്തെ പരസ്യമായി അധിക്ഷേപിച്ചും തലയിലെ തട്ടം അഴിപ്പിക്കുന്നതില് കമ്യൂണിസ്റ്റ് പാര്ട്ടിയുടെ മഹത്വം വിവരിച്ചും നടത്തിയ പ്രസംഗം മുസ്ലിം സമുദായത്തോടുള്ള വെല്ലുവിളിയാണ്. ഇതിനെ തള്ളിപ്പറയാനും പരസ്യമായി തിരുത്തിക്കാനും സി.പി.എം തയാറാകണമെന്നും കമ്മിറ്റി പറഞ്ഞു.
‘മലപ്പുറത്ത് നിന്ന് വരുന്ന പുതിയ പെണ്കുട്ടികളെ കാണൂ നിങ്ങള്. തട്ടം തലയിലിടാന് വന്നാല് അത് വേണ്ടായെന്ന് പറയുന്ന പെണ്കുട്ടികള് മലപ്പുറത്തുണ്ടായത് കമ്മ്യൂണിസ്റ്റ് പാര്ട്ടി കേരളത്തില് വന്നതിന്റെ ഭാഗമായിട്ടുതന്നെയാണ്.
വിദ്യാഭ്യാസമുണ്ടായതിന്റെ ഭാഗമായിട്ടാണ് ഈ മാറ്റങ്ങള് ഉണ്ടായത്. സ്വതന്ത്രചിന്ത വന്നതില് കമ്മ്യൂണിസ്റ്റ് പ്രസ്ഥാനത്തിന്റെ പങ്ക് ചെറുതല്ല,’എന്നാണ് സിപിഎം നേതാവ് അഡ്വ.അനില്കുമാര് യുക്തിവാദ സംഘടനയായ എസന്സ് ഗ്ലോബല് സംഘടിപ്പിച്ച ‘ലിറ്റമസ് 23’ നാസ്തിക സമ്മേളനത്തില് സംസാരിച്ചത്.
സംഭവത്തില് പ്രതിഷേധിച്ച് കെടി ജലീലും, മുസ്ലിംലീഗ് നേതാവ് കെപിഎ മജീദും നേരത്തെ രംഗത്ത് വന്നിരുന്നു.
