തിരുവനന്തപുരം: സിപിഎം നേതാവ് അഡ്വ.അനില്കുമാറിന് കിട്ടേണ്ടിടത്തിന് കിട്ടേണ്ടത് കിട്ടി. എല്ലായിടത്തും പോയി സിപിഎം വീമ്പ് പറയരുതെന്നും. ഹിന്ദുവിശ്വാസികളെ പറയുമ്പോലെ ആവില്ലെന്നും…
സി. രവിചന്ദ്രന്റെ നേതൃത്വത്തിലുള്ള യുക്തിവാദ സംഘടനയായ എസന്സ് ഗ്ലോബല് സംഘടിപ്പിച്ച ലിറ്റ്മസ് 23 നാസ്തിക സമ്മേളനമാണ് വേദി. സിപിഎം നേതാവല്ലെ കുറച്ച് സിപിഎം തത്വങ്ങളും സ്വതന്ത്രചിന്തയും കൂട്ടിച്ചേര്ത്ത് ഒരു തള്ള് തള്ളി…. അതിങ്ങനെ….
‘മലപ്പുറത്ത് നിന്ന് വരുന്ന പുതിയ പെണ്കുട്ടികളെ കാണൂ നിങ്ങള്. തട്ടം തലയിലിടാന് വന്നാല് അത് വേണ്ടായെന്ന് പറയുന്ന പെണ്കുട്ടികള് മലപ്പുറത്തുണ്ടായത് കമ്മ്യൂണിസ്റ്റ് പാര്ട്ടി കേരളത്തില് വന്നതിന്റെ ഭാഗമായിട്ടുതന്നെയാണ്.
വിദ്യാഭ്യാസമുണ്ടായതിന്റെ ഭാഗമായിട്ടാണ് ഈ മാറ്റങ്ങള് ഉണ്ടായത്. സ്വതന്ത്രചിന്ത വന്നതില് കമ്മ്യൂണിസ്റ്റ് പ്രസ്ഥാനത്തിന്റെ പങ്ക് ചെറുതല്ല,’ ഇത്രയേ പറഞ്ഞുള്ളു.
ഇത് സ്വതന്ത്രനായി സിപിഎമ്മിലേക്ക് നടന്നുവന്ന കെടി ജലീലില് എംഎല്എയ്ക്ക് അത്രയ്ക്ക് സുഖിച്ചില്ല. ഉടനെ വന്നു ഫേസ്ബുക്ക് പോസ്റ്റ്.
തട്ടമിടാത്തത് പുരോഗമനത്തിന്റെ അടയാളമല്ലെന്നും കമ്മ്യൂണിസ്റ്റ് പാര്ട്ടി കേരളത്തില് ഒരു മുസ്ലിം പെണ്കുട്ടിയെയും തട്ടമിടാത്തവളാക്കി മാറ്റിയിട്ടില്ലെന്നും ജലീല് പറഞ്ഞു.
കേരളത്തിലെ 26 ശതമാനം വരുന്ന മുസ്ലിം സമൂഹത്തെക്കുറിച്ച് അത്യാവശ്യത്തിനുപോലുമുള്ള അറിവ് വലിയൊരു ശതമാനം പൊതുപ്രവര്ത്തകര്ക്കും സാഹിത്യകലാസാംസ്കാരിക നായകര്ക്കും പത്രമാധ്യമ പ്രവര്ത്തകര്ക്കും മതസാമുദായിക നേതാക്കള്ക്കുമില്ല. അത് ഏത് രാഷ്ട്രീയ ചേരിയില്പ്പെട്ടവരാണെങ്കിലും ശരി. അതുകൊണ്ടാണ് ഇത്തരത്തിലുള്ള പിശകുകള് പലപ്പോഴും സംഭവിക്കുന്നതെന്നും ജലീല് കുറ്റപ്പെടുത്തി.
സ്വന്തം നിരീക്ഷണങ്ങള് താന് പ്രതിനിധാനം ചെയ്യുന്ന പാര്ട്ടിയുടേതാണെന്ന തരത്തിലുള്ള അഭിപ്രായപ്രകടനങ്ങള് ഉണ്ടാകാതെ സൂക്ഷിക്കണം. വര്ഗീയമനോഭാവമുള്ളവരും രാഷ്ടീയവൈരികളും അത് വ്യാപകമായി ദുരുപയോഗം ചെയ്യുമെന്നും സ്വതന്ത്രചിന്ത എന്നാല് തട്ടമിടാതിരിക്കലാണെന്ന് ആരെങ്കിലും തെറ്റിദ്ധരിച്ചതിനെ പഴിചാരി കമ്മ്യൂണിസ്റ്റ് പാര്ട്ടിയെ പ്രതിക്കൂട്ടിലാക്കാന് ആരും ശ്രമിക്കേണ്ടെന്ന് ജലീല് വ്യക്തമായി പറഞ്ഞു.
എന്തായാലും മുസ്ലിലീഗിന് കാര്യംപിടികിട്ടി. സിപിഎമ്മുകാരുടെ ഉള്ളിലിരിപ്പ് എന്താണെന്ന് വ്യക്തമാക്കുന്ന സംഭവമാണ് നാസ്തിക സമ്മേളനത്തിലെ അനില് കുമാറിന്റെ പ്രസംഗമെന്ന് കെ പി എ മജീദ് തുറന്നു പറഞ്ഞു. മലപ്പുറത്തെ കുട്ടികള് തട്ടം ഉപേക്ഷിക്കുകയാണെന്നും അത് സിപിഐഎമ്മിന്റെ നേട്ടമാണെന്നും പറയണമെങ്കില് ചെറിയ തൊലിക്കട്ടിയൊന്നും പോരെന്നും, മലപ്പുറത്തിന്റെ ഉള്ളടക്കം വര്ഗീയമാണെന്ന് പറഞ്ഞ അതേ സിപിഎമ്മാണ് ഇപ്പോള് കുട്ടികളൊക്കെ തട്ടം ഉപേക്ഷിക്കുകയാണെന്ന വിചിത്രമായ കണ്ടുപിടുത്തം നടത്തിയിരിക്കുന്നതെന്നും അദ്ദേഹം വ്യക്തമാക്കി.
വനിതാ മതില് കെട്ടുമ്പോഴും പ്രകടനത്തിന്റെ മുന്നിലെ കെട്ടുകാഴ്ചക്കും നിങ്ങള്ക്ക് ശിരോവസ്ത്രമിട്ട പെണ്കുട്ടികളെ വേണം. എന്നാലോ അതിനോടുള്ള പുച്ഛത്തിന് മാത്രം യാതൊരു മാറ്റവുമില്ലെന്നും അദ്ദേഹം പറഞ്ഞു.
സോവിയറ്റ് റഷ്യയിലെ മുസ്ലിംകളും ഇതേ അവസ്ഥയിലൂടെയാണ് കടന്നുപോയതെന്ന് ചരിത്രം പരിശോധിച്ചാല് ബോധ്യപ്പെടും. തട്ടമിട്ട മലപ്പുറത്തെ കുട്ടികളുടെ രാഷ്ട്രീയ ബോധം പോലും ഈ കപടന്മാര്ക്ക് ഇല്ലാതെ പോയല്ലോ എന്നതിലാണ് അത്ഭുതം. നിങ്ങളുടെ ഹിപ്പോക്രസിയെ തുറന്ന് കാട്ടാന് ഞങ്ങളുടെ തട്ടമിട്ട കുട്ടികള് തന്നെ ധാരാളമാണെന്നും കെ പി എ മജീദ് പരിഹസിച്ചു.
