പത്തനംതിട്ട: ബലാല്സംഗ കേസിലെ പ്രതി നടന് ദിലീപിനൊപ്പം പോലീസുകാര്ക്ക് സെല്ഫി എടുക്കാമെങ്കില് കോടതി കുറ്റവിമുക്തനാക്കിയ ഗ്രോ വാസുവിന്റെ ഫോട്ടോ ഫേസ് ബുക്കിലിട്ടാല് എന്താണു കുഴപ്പമെന്ന് അച്ചടക്ക നടപടി നേരിടുന്ന പോലീസുകാരന്. ജയിലില് നിന്നും ഇറങ്ങിയ ഗ്രോ വാസുവിനെ സ്വീകരിക്കുകയും ഫോട്ടോ സമൂഹമാധ്യമത്തിലിടുകയും ചെയ്തതിന് കാരണംകാണിക്കല് നോട്ടീസ ലഭിച്ച ആറന്മുള സ്റ്റേഷനിലെ സിവില് പോലീസ് ഓഫീസര് ഉമേഷ് വള്ളിക്കുന്ന് നല്കിയ മറുപടിയിലാണ് പോലീസ്് നേതൃത്വത്തെ കുറ്റപ്പെടുത്തിക്കൊണ്ടുള്ള മറുപടി നല്കിയത്.
നവമാധ്യമങ്ങളില് ഇടപെടുന്നതിന് പോലീസ് മേധാവി ഇറക്കിയ സര്ക്കുലറിന് വിരുദ്ധമായാണ് ഉമേഷ് പ്രവര്ത്തിച്ചതെന്ന് മെമ്മോയില് ചൂണ്ടിക്കാട്ടുന്നു. ഗുരുതരമായ അച്ചടക ലംഘനവും കൃത്യവിലോപവുമാണെന്ന് ഡിവൈഎസ് പി എസ്. നന്ദകുമാറിന്റെ കാരണം കാണിക്കല് നോട്ടീസില് പറഞ്ഞിരുന്നു. അതിനെയും കളിയാക്കുന്ന മറുപടിയാണ് ഉമേഷ് നല്കിയത്. നോട്ടീസില് സൂചിപ്പിക്കുന്ന ഉത്തരവ് ഇറക്കിയത് സര്ക്കാര് സ്ഥാനഭ്രഷ്ടനാക്കുകയും പിന്നീട് കോടതി ഉത്തരവിലൂടെ പോലീസ് മേധാവി (ടി പി സെന്കുമാര്)യായി എത്തുകയും ചെയ്ത ആളുടെ സര്ക്കുലറാണ്. അത് കോടതി ഉത്തതരവിനെ പോലീസ് അംഗീകരിക്കുന്നതിന് തെളിവാകുമ്പോള് നിസ്സാര കുറ്റം ആരോപിക്കപ്പെടുകയും കോടതി കുറ്റമുക്തനാക്കുകയും ചെയ്ത ാെരാളെ ( ഗ്രോ വാസു) അകറ്റി നിര്ത്തുന്നത് പരിഷ്കൃത സമൂഹത്തിന് ചേര്ന്നതല്ല എന്നാണ് ഉമേഷ് മറുപടിയില് വ്യക്തമാക്കുന്നത്.
പോലീസ് സേനയുടെ അന്തസിന് കളങ്കമുണ്ടാക്കിയതിനാല് 24 മണിക്കൂറിനുള്ളില് വിശദീകരണം നല്കണമെന്നും നോട്ടീസില് വ്യക്തമാക്കിയിരുന്നു. അതിനുള്ള മറുപടി എന്ന നിലയിലാണ് നടന് ദിലീപിന്റെ കാര്യം പേരു പറയാതെ സൂചിപ്പിക്കുന്നത്.
കേരളം കണ്ട കുപ്രസിദ്ധ ബലാല്സംഗ കേസിലെ പ്രതി ആറന്മുള ക്ഷേത്രത്തില് എത്തി വള്ളസദ്യ നടത്തിയപ്പോള് ആദ്യവസാനം കൂടെ നില്ക്കാനും ഭക്തജനങ്ങളുടെ സെല്ഫിയെടുക്കലിന് സഹായിക്കാനും അങ്ങയുടെ കീഴിലെ പോലീസ് ഉദ്യോഗസ്ഥനെ യൂണിഫോമില് അയച്ചതും, ഈ ഉദ്യോഗസ്ഥന് ഇപ്പോഴും വിചാരണയിലിരിക്കുന്ന കേസിലെ പ്രതിയുടെ വീഡിയോ എടുത്ത് ആരാധനയോടെ സോഷ്യല് മീഡിയയില് ഇട്ടതും എന്തൊരു വിരോധാഭാസമാണ്.
ഉമേഷ് എന്ന താഴേക്കിടയിലുള്ള ഒരു പോലീസുകാരന് ഗ്രോ വാസുവിന്റെ ഫോട്ടോ സമൂഹമാധ്യമത്തിലിട്ടാല് പോലീസിന്റെ അന്തസ് കളങ്കപ്പെടില്ല. പോലീസിന്റെ അന്തസ് കളങ്കപ്പെടുത്തുന്നത് ആരൊക്കെയാണെന്ന് മേലധികാരികള്ക്ക് അറിയാവുന്നതാണല്ലോയെന്നും ഉമേഷ് മറുചോദ്യവും ഉയര്ത്തുന്നു.
