തിരുവനന്തപുരം: സംസ്ഥാന ബിവറേജസ് കോര്പ്പറേഷന്റെ കീഴിലുള്ള ബെവ്കോ ഔട്ട്ലെറ്റുകളില് വിജിലന്സിന്റെ മിന്നല് പരിശോധന. ഓപ്പറേഷന് മൂണ്ലൈറ്റ് എന്ന പേരില് തിരഞ്ഞെടുത്ത ബെവ്കോ ഔട്ട്ലെറ്റുകളില് ഇന്നലെ 6.30 മുതലായിരുന്നു പരിശോധന. മദ്യം വാങ്ങാന് എത്തുന്നവരില് നിന്നും കൂടുതല് വില ഈടാക്കുന്നു, കുറഞ്ഞ വിലയിലുള്ള മദ്യം സ്റ്റോക്കുണ്ടെങ്കിലും വില കൂടിയ മദ്യം അടിച്ചേല്പ്പിക്കുന്നു, മദ്യകമ്പനികളുടെ ഏജന്റുമാരില് നിന്നും ഉദ്യോഗസ്ഥര് കമ്മീഷന് കൈപ്പറ്റുന്നു എന്നിങ്ങനെയുള്ള പരാതികളുടെ അടിസ്ഥാനത്തിലായിരുന്നു പരിശോധന.
ഓരോ ദിവസത്തെയും മദ്യത്തിന്റെ സ്റ്റോക്കും വിലവിവരവും ഉപഭോക്താക്കള് കാണുന്ന രീതിയില് എഴുതി പ്രദര്ശിപ്പിക്കണമെന്ന വ്യവസ്ഥ പല ഔട്ട് ലെറ്റുകളിലും പാലിക്കാറില്ല. ബില്ല് നല്കാതെ ഇതരസംസ്ഥാനക്കാരായ ഉപഭോക്താക്കള്ക്ക് മദ്യം വില്ക്കുന്നു. കേടുപാടുകളൊന്നുമില്ലെങ്കിലും ഡാമേജ് ഇനത്തില് കാണിച്ച് ബില്ല് നല്കാതെ വിറ്റഴിച്ച് ഉദ്യോഗസ്ഥര് പണം വീതിച്ചെടുക്കുന്നുവെന്നും പരാതിയുണ്ട്. മദ്യക്കുപ്പി പൊതിഞ്ഞ് നല്കാനുള്ള കടലാസ് വാങ്ങാതെ വാങ്ങിയതായി കാണിച്ച് പണം തിരിമറി നടത്തുന്നതായും മദ്യം പൊതിയാതെ നല്കുന്നതായും കണ്ടെത്തിയിട്ടുണ്ട്.
ആകെ 78 ബെവ്കോ ഔട്ട്ലെറ്റുകളിലാണ് മിന്നല് പരിശോധന നടത്തുന്നത്. തിരുവനന്തപുരം-11, എറണാകുളം-10, കോഴിക്കോട്-ആറും, കൊല്ലം, പത്തനംതിട്ട, കോട്ടയം, ഇടുക്കി, ആലപ്പുഴ, മലപ്പുറം, കണ്ണൂര്-അഞ്ചു വീതം, തൃശ്ശൂര്, പാലക്കാട്, വയനാട്, കാസര്കോട്-നാല് വീതവും ഔട്ട്ലെറ്റുകളിലാണ് പരിസോധന. വിജിലന്സ് ഡയറക്ടര് ടി.കെ. വിനോദ്കുമാറിന്റെ ഉത്തരവ് പ്രകാരം വിജിലന്സ് ഐജി ഹര്ഷിത അത്തല്ലൂരിയുടെ മേല്നോട്ടത്തില് എസ്പി റജി ജേക്കബ്ബിന്റെ നേതൃത്വത്തിലാണ് പരിശോധന നടക്കുന്നത്.
പൊതുജനങ്ങളുടെ ശ്രദ്ധയില് അഴിമതി സംബന്ധിച്ച വിവരങ്ങള് ലഭിക്കുകയാണെങ്കില് വിജിലന്സിന്റെ ടോള് ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്സ്ആപ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലന്സ് ഡയറക്ടര് അറിയിച്ചു.
