ഇളങ്ങുളം: പി.പി.റോഡില്‍ ഇളങ്ങുളം എസ്എന്‍ഡിപി പടിക്ക് സമീപം പറമ്പില്‍ വന്‍തോതില്‍ മാലിന്യം തള്ളുന്നത് പ്രദേശവാസികള്‍ക്ക് ദുരിതമായി.
റോഡരികില്‍ ആള്‍പ്പാര്‍പ്പില്ലാത്ത പറമ്പിലേക്ക് വിവിധയിടങ്ങളില്‍ നിന്നെത്തുന്നവര്‍ മാലിന്യം ഇടുന്നുണ്ട്. കടകളില്‍ നിന്നുള്ള മാലിന്യം, ഭക്ഷണാവശിഷ്ടം, ഇറച്ചിമാലിന്യം എന്നിങ്ങനെയുള്ളവ ചീഞ്ഞ് ദുര്‍ഗന്ധമേറി. ബസ് സ്റ്റോപ്പിനോട് ചേര്‍ന്നാണിത്. ഇവിടെ ബസ് കാത്തുനില്‍ക്കാന്‍ സാധിക്കാത്ത വിധം ദുര്‍ഗന്ധം പരക്കുന്നുണ്ട്.
തെരുവ്നായകള്‍ മാലിന്യം കടിച്ചുവലിച്ച് വീടുകളുടെ പരിസരത്ത് ഇടുന്നതും ദുരിതമായി. തര്‍ക്കത്തില്‍ കിടക്കുന്ന ഭൂമിയായതിനാല്‍ നിയന്ത്രിക്കാനാരുമില്ലതാനും. മാലിന്യമിടുന്നവരെ കണ്ടെത്താന്‍ പ്രദേശത്ത് ക്യാമറ സ്ഥാപിക്കണമെന്നും കുറ്റക്കാര്‍ക്ക് പിഴശിക്ഷ നല്‍കണമെന്നും നാട്ടുകാര്‍ ആവശ്യപ്പെട്ടു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: