തൃശൂര്‍: സിപിഎം സംസ്ഥാന സെക്രട്ടേറിയറ്റംഗം പി.കെ. ബിജുവിനെ റെയില്‍വെ സ്റ്റേഷനില്‍ നിന്നു കൊണ്ടുപോകാന്‍ എത്തിയ കാര്‍ കുന്നംകുളത്തെ മദ്യ കച്ചവടക്കാരന്റെ ഡ്രൈവറുടേത്. അഴീക്കോടന്‍ രാഘവന്‍ ദിനത്തില്‍ പങ്കെടുക്കാന്‍ എത്തിയതായിരുന്നു മുന്‍ എംപി കൂടിയായ പി.കെ. ബിജു. കരുവന്നൂര്‍ തട്ടിപ്പുമായി ബന്ധപ്പെട്ട് പ്രതിരോധത്തിലായ സിപിഎമിനെ കൂടുതല്‍ പ്രതിസന്ധിയിലാക്കുന്നതാണ് പി.കെ. ബിജുവിന്റെ നടപടി.
സംസ്ഥാന സെക്രട്ടേറിയറ്റംഗം എന്ന നിലയില്‍ ബിജുവിന് സഞ്ചരിക്കാന്‍ പാര്‍ട്ടി ജില്ലാ കമ്മിറ്റിയുടെ കാര്‍ ഉപയോഗിക്കാവുന്നതാണ്. എന്നാല്‍ ഇതെല്ലാം വേണ്ടെന്ന് വച്ചാണ് മദ്യക്കച്ചവടക്കാരന്റെ ഡ്രൈവറുടെ കാര്‍ സഞ്ചരിക്കാനായി തിരഞ്ഞെടുത്തത്. കെഎല്‍ 55 യു 7777 എന്ന നമ്പറിലുളള വെളള ഇന്നോവ ക്രിസ്റ്റ കാര്‍ കുന്നംകുളം ചിറ്റഞ്ഞൂര്‍ സ്വദേശി എന്‍. ബിനീഷിന്റെ പേരിലാണ് രജിസ്റ്റര്‍ ചെയ്തിരിക്കുന്നത്.
ഇന്നോവ ക്രിസ്റ്റ പോലുളള കാര്‍ വാങ്ങാനുളള സാമ്പത്തികശേഷിയുളള വ്യക്തിയല്ല ബിനീഷ്. ഇയാള്‍ കുന്നംകുളത്ത് പച്ചക്കായ വില്‍ക്കുന്ന കടയിലെ ജീവനക്കാരനാണ്. യുഎഇയില്‍ ബിസിനസ് നടത്തുന്ന കുന്നംകുളം പഴഞ്ഞി ജെറുസലേമിലുളള ഷാജുവിന്റെ ഡ്രൈവര്‍ കൂടിയാണ് ബിനീഷ്. ഷാജുവിന്റെ നാട്ടിലെ കാര്യങ്ങള്‍ നോക്കി നടത്തുന്നത് ബിനീഷാണ്.
നേരത്തെ ഇ ഡി അറസ്റ്റ് ചെയ്ത കോട്ടോര്‍ തമ്പി എന്ന വ്യവസായിയുടെ യുഎഇയിലുളള മദ്യക്കച്ചവടം അടക്കമുളള ബിസിനസ്സ് കൈകാര്യം ചെയ്യുന്നത് പാര്‍ട്ട്ണര്‍ കൂടിയായ ഷാജുവാണ്. സിപിഎം സംസ്ഥാന നേതാക്കള്‍ ജില്ലയില്‍ എത്തുമ്പോള്‍ ബിനീഷിന്റെ കാറിലാണ് സഞ്ചരിക്കുന്നതെന്നും സൂചനയുണ്ട്.
പ്രതികരിക്കാൻ ഇവിടെ എഴുതുക: