വൈക്കം: താലൂക്കിലെ പഞ്ചായത്തുകളില്‍ വഴിയരികിലെ അനധികൃത ഇറച്ചിക്കച്ചവടം വ്യാപകമാവുന്നു. വൈക്കം താലൂക്കില്‍ ഏറ്റവും കൂടുതല്‍ ഇറച്ചിക്കച്ചവടം നടക്കുന്നത് ടി.വി പുരം, വെച്ചൂര്‍ പഞ്ചായത്തുകളിലാണ്. ഇവിടെ വഴിയോരത്ത് നടത്തുന്ന അനധികൃത ഇറച്ചിക്കച്ചവടത്തിനെതിരെ പ്രതിഷേധം ശക്തമായി.
ലൈസന്‍സില്ലാതെ നടത്തുന്ന കച്ചവടം മൂലം പഞ്ചായത്തിന് ലഭിക്കേണ്ട ലൈസന്‍സ് ഫീസ് ഇനത്തില്‍ വന്‍തുകയാണ് നഷ്ടമാകുന്നത്. പ്രധാനമായും ഞായറാഴ്ച ദിവസങ്ങളില്‍ നടക്കുന്ന കച്ചവടമായതിനാല്‍ അധികൃതരുടെ ഭാഗത്തുനിന്നുളള നടപടി ഉണ്ടാകുന്നില്ലെന്നത് കച്ചവടം നടത്തുന്നവര്‍ക്ക് സഹായകമാകുന്നു.
രക്തം വാര്‍ന്നോലിക്കുന്ന നിലയില്‍ പൊതുവഴിയുടെ സമീപത്ത് യാതൊരു മറയുമില്ലാത്ത രീതിയിലാണ് കച്ചവടം നടത്തുന്നത്. പലപ്പോഴും ഇറച്ചിയുടെ വേസ്റ്റ് വഴിയരികിയില്‍ ഉപേക്ഷിക്കുന്നതും തെരുവുനായുടെ ശല്ല്യം വദ്ധിക്കുവാന്‍ കാരണമായിട്ടുണ്ട്. കശാപ്പിനുപയോഗിക്കുന്ന മൃഗത്തെ മൃഗഡോക്ടര്‍ പരിശോധിച്ച് രോഗമില്ലെന്ന സര്‍ട്ടിഫിക്കറ്റ് നല്കിയാല്‍ മാത്രമെ കശാപ്പ് ചെയ്യാന്‍ പാടുള്ളു.
എന്നാല്‍ ടിവി പുരം, വെച്ചൂര്‍ പഞ്ചായത്തുകള്‍ ഉള്‍പ്പെടെ ഒരു സ്ഥലത്തും മൃഗഡോക്ടറെ കൊണ്ടു പരിശോധന നടത്താതെയാണ് ഇറച്ചി കച്ചവടം നടത്തുന്നത്.ഇറച്ചിക്ക് തൂക്കം കിട്ടാന്‍ മാരകമായ മരുന്നുകള്‍ മൃഗങ്ങളില്‍ കുത്തിവെയ്‌ക്കുന്നതായി ആക്ഷേപമുണ്ട്. ഇവ ഉപയോഗിക്കുന്നത്. ഗുരുതരമായ ആരോഗ്യ പ്രശനങ്ങള്‍ക്ക് കാരണമാകുമെന്ന് ഡോക്ടര്‍മാര്‍ പറയുന്നു. താലൂക്കില്‍ എറ്റവും കൂടുതല്‍ ക്യാന്‍സര്‍ രോഗികള്‍ ഉള്ളത് ടി.വി.പുരത്താണെന്ന് ആരോഗ്യ വിഭാഗം നടത്തിയ പഠനത്തില്‍ തെളിഞ്ഞിരുന്നു.
ഒരു കടയില്‍ മാത്രം 500 കിലോയിലധികം ഇറച്ചി കച്ചവടം ഞായറാഴിച്ച മാത്രം നടക്കുന്നുണ്ട്. അധികൃതരുടെ അടിയന്തിരശ്രദ്ധ ഇക്കാര്യത്തില്‍ അറിഞ്ഞില്ലെങ്കില്‍ ഗുരുതരമായ ആരോഗ്യ പ്രശ്‌നങ്ങള്‍ക്ക് കാരണമാകാം.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: