കൊച്ചി: സൗദി വനിതയോട് ലൈംഗികാതിക്രമം നടത്തിയെന്ന പരാതിയില്‍ വ്‌ലോഗറും യുട്യൂബറുമായ ഷാക്കിര്‍ സുബ്ഹാനു ചോദ്യം ചെയ്യലിന് ഹാജരാകണമെന്ന് പോലീസ്. വിദേശത്തുള്ള ഷക്കീറിനോട് നാട്ടിലെത്തിയാലുടന്‍ ഹാജരാകാനാണ് എറണാകുളം സെന്‍ട്രല്‍ പോലീസ് നിര്‍ദ്ദേശം നല്‍കിയത്.
ചികിത്സാര്‍ത്ഥം കൊച്ചിയില്‍ തുടരുന്ന സൗദി യുവതിയുടെ മൊഴിയെടുക്കല്‍ ഈ ആഴ്ചയുണ്ടാകും. അഭിമുഖത്തിനെന്ന പേരില്‍ ഹോട്ടലിലേക്ക് ക്ഷണിച്ചുവരുത്തി പീഡിപ്പിക്കാന്‍ ശ്രമിച്ചെന്നാണ് സൗദി വനിതയുടെ പരാതി. അഭിമുഖത്തിനായി എറണാകുളത്തെ ഹോട്ടലിലേക്കാണ് മല്ലു ട്രാവലര്‍ ഇവരെ ക്ഷണിച്ചത്. ഹോട്ടലിലെത്തിയപ്പോഴാണ് അപമര്യാദയായി പെരുമാറിയതും പീഡിപ്പിക്കാന്‍ ശ്രമിച്ചതും.
എന്നാല്‍ പരാതി വ്യാജമാണെന്ന നിലപാടിലാണ് ഷാക്കിര്‍ സുബ്ഹാന്‍. തനിക്കെതിരായ പരാതിയെ മതിയായ തെളിവുകള്‍ കൊണ്ട് നേരിടുമെന്നും ഷാക്കിര്‍ പ്രതികരിച്ചിരുന്നു. നിലവില്‍ കാനഡയിലുള്ള ഷാക്കിര്‍, നാട്ടില്‍ തിരിച്ചെത്തിയാലുടന്‍ എല്ലാക്കാര്യങ്ങളും വിശദമാക്കുമെന്നാണ് അറിയിച്ചിരിക്കുന്നത്. സമൂഹമാദ്ധ്യമങ്ങളില്‍ പോസ്റ്റ് ചെയ്ത വിഡിയോയിലൂടെയാണ് ഷാക്കിര്‍ പ്രതികരണം അറിയിച്ചത്.
പ്രതികരിക്കാൻ ഇവിടെ എഴുതുക: