ലക്നൗ : ഡേവിസ് കപ്പ് ടെന്നീസ് വേള്ഡ് ഗ്രൂപ്പ്-2 മത്സരത്തിന്റെ ഡബിള്സില് ഇന്ത്യയുടെ യുകി ഭാംബ്രി-രോഹന് ബൊപ്പണ്ണ സഖ്യം ഇന്ന് മൊറോക്കന് ജോഡി എലിയറ്റ് ബെഞ്ചട്രിറ്റ്-യൂനസ് ലാലാമി ലറൂസി എന്നിവരെ നേരിടും.
വിജയിക്കുന്ന ടീം രണ്ട് സിംഗിള്സ്, രണ്ട് റിവേഴ്സ് സിംഗിള്സ്, ഒരു ഡബിള്സ് എന്നിവയുള്പ്പെടെയുളള അഞ്ച് മത്സരങ്ങളില് മൂന്നെണ്ണമെങ്കിലും ജയിക്കണം.
കഴിഞ്ഞ ദിവസം നടന്ന ഡേവിസ് കപ്പ് വേള്ഡ് ഗ്രൂപ്പ്-2 മത്സരത്തിന്റെ രണ്ടാം സിംഗിള്സില് ഇന്ത്യയുടെ സുമിത് നാഗല് മൊറോക്കോയുടെ ആദം മൗണ്ടിറിനെ 6-3, 6-3 എന്ന സ്കോറിന് തോല്പ്പിച്ചു.ആദ്യ സിംഗിള്സില് മൊറോക്കോയുടെ യാസിന് ദിലിമി 3-2ന് ഇന്ത്യയുടെ ശശികുമാര് മുകുന്ദിനെ പരാജയപ്പെടുത്തി.
ഉത്തര്പ്രദേശിലെ ലഖ്നൗവിലെ വിജയന്ത് ഖണ്ഡ് ഗോമതി നഗര് സ്റ്റേഡിയത്തിലാണ് മത്സരങ്ങള് നടക്കുന്നത്.
ഈ വര്ഷം ഫെബ്രുവരിയില് നടന്ന ഡേവിസ് കപ്പ് 2023 വേള്ഡ് ഗ്രൂപ്പ് I പ്ലേഓഫില് ഡെന്മാര്ക്കിനോട് 3-2 ന് തോറ്റ ഇന്ത്യ ലോക ഗ്രൂപ്പ് II ലേക്ക് തരംതാഴ്ത്തപ്പെട്ടു. മൊറോക്കോയ്ക്കെതിരെ വിജയിച്ചാല് പ്ലേ ഓഫ് മത്സരത്തിലേക്ക് മുന്നേറുന്ന ഇന്ത്യന് ടീമിന് ഡേവിസ് കപ്പ് വേള്ഡ് ഗ്രൂപ്പ് Iല് വീണ്ടും പ്രവേശിക്കാനുള്ള അവസരവും ലഭിക്കും.
